Выйшаў у свет чэрвеньскі нумар каталіцкага часопіса «Ave Maria», у якім чытачы знойдуць матэрыялы пра ўшанаванне Найсвяцейшага Сэрца Езуса, якому асабліва прысвечаны гэты месяц, а таксама на іншыя важныя і актуальныя тэмы з жыцця Касцёла ў Беларусі.
Ніжэй пададзены кароткі агляд матэрыялаў нумара, размешчаны на сайце выдання ave-maria.by.
«Палымнеючае вогнішча міласці», «усіх цнотаў глыбіня бяздонная», «крыніца жыцця і святасці»…
Мноства такіх дзівосных, змястоўных і праўдзівых эпітэтаў мы спяваем і прамаўляем Найсвяцейшаму Сэрцу Езуса ў вядомай літаніі падчас чэрвеньскіх набажэнстваў. І кожны з гэтых вобразаў варты грунтоўнай тэалагічнай працы — настолькі старажытная, багатая і важная гісторыя культу, пра які сцісла распавядае Аліна Новікава ў матэрыяле «Сэрца Езуса — знак збаўлення для сучаснага свету», змешчаным у чэрвеньскім нумары часопіса «Ave Maria» і прысвечаным інтранізацыі Найсвяцейшага Сэрца Езуса — прысвячэнню Яму сябе, сваёй сям’і, парафіі ці іншай супольнасці.
Чаму культ Сэрца Езуса такі важны для чалавецтва? І што з’яўляецца вызначальнікам велічы чалавека? На гэтыя пытанні адказвае айцец Юрый Кулай OCD у сваім артыкуле «З клопатам пра людское сэрца» ў рубрыцы «Школа малітвы». Пра адну з самых загадкавых і цікавых якасцяў Божага Сэрца разважае ксёндз Андрэй Рылка ў матэрыяле «Суцішэнне Сэрца як прастора найвялікшых цудаў Бога» (рубрыка «Святар адказвае на пытанне»).
«Фаніпаль — парафія двух сэрцаў» — так называецца артыкул Галіны Калевіч пра гісторыю заснавання і духоўнае жыццё парафіі Найсвяцейшага Сэрца Езуса і Беззаганнага Сэрца Марыі ў Фаніпалі на Міншчыне. Карэспандэнт часопіса запісала таксама сведчанні саміх парафіянаў, якія робяць актыўны і важны ўнёсак у развіццё сваёй рэлігійнай супольнасці, чэрпаючы адтуль духоўную моц.
Іна Бігель у рэпартажы «„За сцяною горада“ ўзвысіўся храм» распавядае пра стварэнне ў Мінску маладой парафіі і пасвячэнне новазбудаванага касцёла святога Францішка, якім апякуецца ордэн Меншых Братоў Капуцынаў.
Цікавыя матэрыялы, прысвечаныя культу Найсвяцейшага Сэрца Езуса і некаторым іншым важным тэмам з жыцця Каталіцкага Касцёла прапануюць на старонках часопіса пастаянныя аўтары выдання: Данута Бічэль (у новым нумары змешчаны яе таленавітыя вершы), Паліна Грыб, сястра Паўла Бобер MSF, Віктар Ведзень і іншыя.
На апошніх старонках вокладкі чытачы знойдуць малітвы для акту інтранізацыі Найсвяцейшага Сэрца Езуса.
