4 студзеня ў санктуарыі Маці Божай Валадаркі азёраў у Браславе біскуп Віцебскі Алег Буткевіч узначаліў цэлебрацыю пахавальнай святой Імшы па спачылай Леакадзіі Сапель, маме святой памяці ксяндза Міхала Сапеля і бабулі ксяндза Аляксандра Сапеля SDS.
Як паведамляецца на сайце Браслаўскага санктуарыя Waladarka.by, у сваім пастырскім слове біскуп Буткевіч нагадаў прысутным словы з Евангелля: «Чаму вы шукаеце жывога сярод мёртвых? Яго тут няма; Ён уваскрос».
Іерарх падкрэсліў веру і вернасць Богу спачылай Леакадзіі, якая ў цяжкія часы пераследу веры клапацілася пра хрысціянскае выхаванне сваіх дзяцей і ўнукаў.
На пахавальную святую Імшу прыйшлі памаліцца і развітацца з памерлай яе родныя і блізкія, а таксама сёстры Эўхарысткі і вернікі браслаўскай парафіі.
Леакадзія Сапель адышла ў вечнасць 3 студзеня на 91-м годзе жыцця.
Яна была пахаваная на старых могілках у Браславе, побач са сваім мужам Канстанцінам і памерлым крыху больш за год таму сынам, ксяндзом Міхалам Сапелем, першым пробашчам адроджанай Залатагорскай парафіі ў Мінску.
Пахавальныя абрады на могілках правёў біскуп Алег Буткевіч. Іерарх таксама паходзіць з Браслава і добра асабіста ведаў спачылую і яе сям’ю, з якой у двух пакаленнях выйшла два святарскія пакліканні.
