16 чэрвеня ў дыяцэзіяльным санктуарыі Маці Божай Каралевы нашых сем’яў у Тракелях (Гродзенская дыяцэзія, Радунскі дэканат) прайшла святая Імша ў інтэнцыі ксяндза Яна Сарэлы ў трыццаты дзень пасля яго смерці. Парафія ў Тракелях з’яўляецца роднай для ксяндза Яна.
Як падае Прэс-служба Гродзенскай дыяцэзіі, літургію цэлебраваў біскуп Гродзенскі Уладзімір Гуляй. У ёй удзельнічалі блізкія спачылага, парафіяне, шматлікае духавенства, а таксама студэнты Міждыяцэзіяльнай вышэйшай духоўнай семінарыі ў Гродне. На Імшы маліліся аб дары вечнага жыцця для спачылага.
Духавенства і парафіяне адзначаюць, што ў іх памяці ксёндз Ян застаўся як добры пастыр, чалавек малітвы, спакойнага сэрца і вялікай асабістай культуры, які ніколі не імкнуўся да зямной хвалы, а проста, ціха і верна служыў Богу і людзям там, куды яго пасылаў Касцёл.
У гаміліі біскупскі вікарый па справах агульнага душпастырства ў Лідскім рэгіёне ксёндз канонік доктар Віталій Сідорка, разважаючы над біблійнымі падставамі хрысціянскай традыцыі малітвы за памерлых, звярнуў увагу, што смутак, які суправаджае развітанне з блізкім чалавекам, хоць і з’яўляецца натуральным праяўленнем любові, не павінен засланяць хрысціянскай надзеі. Па словах святара, веруючыя пакліканы глядзець далей за межы зямнога жыцця — да радасці сустрэчы з Богам у Яго доме ў вечнасці.
Ксёндз Віталій дадаў, што найлепшае сведчанне памяці пра памерлых — не толькі малітва, але і вернасць у выкананні штодзённых абавязкаў, руплівае служэнне Богу і людзям, а таксама жыццё, напоўненае надзеяй на ўваскрасенне. «Менавіта такой паставы чакаў бы ад нас ксёндз Ян», — сказаў святар.
У канцы Эўхарыстыі біскуп падзякаваў прысутным за ўдзел і падкрэсліў, што адыход кожнага святара ў вечнасць павінен нагадваць аб тым, як патрэбны Касцёлу людзі, якія выбіраюць шлях святарства — адважваюцца пакінуць усё і пайсці за Хрыстом.
Пасля Імшы ўдзельнікі памаліліся на магіле ксяндза Яна на мясцовых могілках.
Ксёндз Ян Сарэла нарадзіўся 28 жніўня 1975 г., паходзіў з парафіі Адведзінаў Найсвяцейшай Панны Марыі ў Тракелях. Прэзбітэрскае пасвячэнне яму ўдзяліў 3 чэрвеня 2000 года ў катэдральнай базыліцы святога Францішка Ксавэрыя ў Гродне біскуп Аляксандр Кашкевіч.
Быў пробашчам парафій святых апосталаў Пятра і Паўла ў Ражанцы (Шчучынскі дэканат) і святога Яна Хрысціцеля ў Воўпе (Мастоўскі дэканат), адказным мадэратарам за пастаянную фармацыю святароў у Гродзенскай дыяцэзіі, мадэратарам апостальскага руху «Маргарытка».
Шмат гадоў быў духоўным айцом супольнасці вышэйшай духоўнай семінарыі ў Гродне.
Адышоў у вечнасць пасля цяжкай хваробы 15 мая.
