У снежні выйшаў у свет новы, апошні ў гэтым годзе, нумар квартальніка «Наша вера» (№ 4 (102) 2022), аўтары якога — мастацтвазнаўцы, гісторыкі, паэты, мастакі і літаратуразнаўцы.
Анонс новага нумару змешчаны на сайце часопіса «Ave Maria».
«Каб напісаць Евангелле паводле свайго жыцця…» — так называецца інтэрв’ю з Мітрапалітам Мінска-Магілёўскім арцыбіскупам Юзафам Станеўскім, якое падрыхтавала галоўны рэдактар часопіса пісьменніца Крыстына Лялько.
Рэстаўратар Ігар Сурмачэўскі прапануе ўвазе чытачоў артыкул «Аздабленне іконы Будслаўскай Багародзіцы ў 1632–1783 гг.» (працяг матэрыялу).
Тэрэcа Клімовіч з польскай мовы пераклала для часопіса інтэрв’ю «Любоў і служэнне» з айцом Станіславам Памыкалам, езуітам, які больш за дзесяць гадоў нёс служэнне ў Беларусі, а ў верасні адышоў у вечнасць.
Алесь Сімакоў у артыкуле «„Індзейская справа“ ў пытаннях і адказах» гаворыць пра адлюстраванне тэмы каталіцкіх місій сярод індзейцаў у даследчай перапісцы.
У рубрыцы «Постаці» змешчана эсэ гісторыка-архівіста Андрэя Шпунта «Місіянер» пра актыўную місіянерскую дзейнасць айца Юзафа Аўлачымскага ОР.
Пісьменнік Франц Сіўко прапануе ўвазе чытачоў артыкул «Праблема нацыянальнай самаідэнтыфікацыі католікаў паўночна-ўсходняй Віцебшчыны».
Светлай памяці Яна Чыквіна прысвечана развітальнае слова «Сляды на першым снезе…» Аксаны Данільчык.
Да 100-годдзя з дня нараджэння пісьменніцы Алены Васілевіч друкуецца яе абразок «Вяртанне».
Маладая беларуская даследчыца Паліна Грыб у эсэ «Ці вартае ХХІ стагоддзе Францыска Скарыны?» разважае пра спектакль «Кар’ера доктара Раўса», які ідзе на сцэне Рэспубліканскага тэатра беларускай драматургіі ў Мінску.
85-годдзю з дня нараджэння гродзенскай паэткі Дануты Бічэль прысвечаны артыкул літаратуразнаўцы Анатоля Брусевіча «Прастора праўдзівага слова».
У рубрыцы «Паэзія» змешчаны вершы Аксаны Данільчык.
У рубрыцы «Проза» друкуецца цікавае апавяданне паэта Леаніда Дранько-Майсюка «Самсон, Панчыха і Сівачок».
Літаратуразнаўца Ірына Багдановіч у артыкуле «Хай табе песні складаць дапаможа Зоф’я святая!» піша пра творчасць Зоф’і Манькоўскай як спадкаемніцы паэтычнай лютні Уладзіслава Сыракомлі.
Паліна Грыб у нататцы «Таямніцы жаночага роду» апавядае пра выставу «Жаночы род», якая экспанавалася ў Нацыянальным мастацкім музеі ў Мінску.
Набыць новы нумар часопіса «Наша вера» можна ў парафіяльных кіёсках.
