У чэрвені ў сеціве з’явіўся прафесійны відэазапіс, які дае магчымасць гледачам апынуцца ў касцёле святых Пятра і Паўла ў вёсцы Мядзведзічы, што на Ляхавіччыне (Пінская дыяцэзія), і паслухаць, як гучыць адноўлены касцёльны арган.
Амаль год таму, 27 чэрвеня 2020 года, адбылася музычная прэзентацыя гэтага ўнікальнага інструмента эпохі рамантызму пасля яго грунтоўнай рэстаўрацыі.
Цяпер жа якасны запіс гучання вядомага беларускага аргана, створанага больш за стагоддзе таму, у 1912 годзе, цяпер з’явіўся ў шырокім доступе.
Для Беларусі гэта першы праэкт адмысловага запісу адрамантаванага да канцэртнага стану гістарычнага касцёльнага аргана. Запіс у высокай якасці фіксуе гук стогадовага касцёльнага інструмента на шырокім дыяпазоне твораў акадэмічнай музыкі (барока, рамантызм, сучасная акадэмічная музыка) і знаёміць гледачоў з супольнасцю беларускіх арганістаў.
Для зручнай навігацыі відэа мае разметку.
