Святам Хросту Пана, якое сёлета будзе адзначацца 12 студзеня, завяршаецца перыяд Божага Нараджэння. Аднак традыцыйныя батлейкі ў нашых касцёлах яшчэ доўга будуць заставацца «цудоўным знакам», бачным адлюстраваннем праўды пра ўцелаўленне спрадвечнага Божага Слова.
Дасланыя ў рэдакцыю здымкі сведчаць пра тое, што традыцыя калядных батлеек жыве і актыўна падтрымліваецца. Многія яслі з Нованароджаным Хрыстом, створаныя рукамі нашых вернікаў, можна назваць сапраўднымі творамі мастацтва. Адчуваецца, што іх рабілі не проста так, «каб было», а з фантазіяй, з творчым падыходам, з зацікаўленасцю і вялікаю любоўю.
Напярэдадні святаў Божага Нараджэння Папа Францішак пажадаў нагадаць усяму Касцёлу пра важнасць падтрымліваць гэтую традыцыю, распачатую святым Францішкам Асізскім у італьянскім мястэчку Грэчо.
З гэтаю мэтаю Святы Айцец напісаў Апостальскі ліст «Цудоўны знак», у якім назваў бэтлеемскія яслі «жывым Евангеллем».
Напэўна, словы пастыра паўсюднага Касцёла натхнілі і заахвоцілі многіх далучыцца да стварэння батлеек у сваіх парафіяльных касцёлах і ў дамах.
Каб прыгажосць жывога Евангелля ўбачылі іншыя, мы, як і ў мінулым годзе, заахвоцілі дасылаць здымкі розных батлеек у рэдакцыю парталу Catholic.by.
Вядома, апублікаваць здымкі батлеек ва ўсіх касцёлах і капліцах нашай Бацькаўшчыны мы не маем тэхнічнай магчымасці, але нават некалькі з іх даюць уяўленне пра тое, як прыгожа яны выглядаюць.
Ёсць батлейкі, у якіх некаторыя элементы нават рухаюцца, таму акрамя здымкаў мы публікуем і невялікае відэа таго, як выглядаюць такія рухомыя бэтлеемскія яслі ў капліцы мінскай парафіі святога Яна Евангеліста і святога Максімільяна Марыі Кольбэ. (Відэа кс. Уладзіміра Марушэўскага TChr)
Традыцыйна батлейкі застаюцца ў касцёлах да свята Ахвяравання Пана, якое адзначаецца 2 лютага і ў народзе часта называецца «Грамніцамі». У гэты дзень у касцёлах адбываецца благаслаўленне свечак, і іх агеньчыкі працягваюць нагадваць нам, што з Нараджэннем Хрыста святло прыйшло ў свет, і мы бачылі яго, і яно назаўжды застаецца з намі.
