16 студзеня ў Хрысціянскім сацыяльным Цэнтры ў Мінску прайшоў квіз, або інтэлектуальная гульня на тэму свята Божага Нараджэння.
Як паведамляецца на сайце Місіі Добрага Самараніна Samaranin.by, у гульні ўзялі ўдзел тры каманды. Іх назвы і дэвіз прыдумалі самі ўдзельнікі. Такім чынам, паміж сабой спаборнічалі Ліхтарыкі, Калядоўшчыкі і Зорачкі.
Гульня складалася з трох тураў. Удзельнікі адказвалі на пытанні, звязаныя з Божым Нараджэннем.
Пытанні былі няпростыя і датычыліся розных аспектаў вялікага хрысціянскага свята: біблійных, мастацкіх, гістарычных, музычных і іншых.
Рыхтаваў і праводзіў гульню добра вядомы наведнікам Місіі Павел Каралёў. Удзельнікі былі вельмі задаволеныя працэсам цікавай і займальнай гульні.
У планах Місіі Добрага Самараніна, пры якой дзейнічае Хрысціянскі сацыяльны цэнтр, праводзіць падобныя мерапрыемствы ў будучыні, пра што будзе паведамляцца дадаткова.
