«Жывое Евангелле» — менавіта так назваў папа Францішак у сваім Апостальскім лісце «Цудоўны знак» калядную батлейку.
Традыцыя ладзіць батлейкі, вядомая ў Касцёле з Сярэднявечча, дапамагае лепш сабе ўявіць і адчуць атмасферу, у якой спрадвечнае Божае Слова сталася Целам. Яслі з Дзіцяткам Езусам, Марыяй і Юзафам, пастушкамі і жывёламі можна сёння ўбачыць практычна ў кожнай святыні.
Батлейкі з захапленнем разглядаюць дзеткі ў той час, як іх бацькі, бабулі і дзядулі пабожна кленчаць перад гэтымі незвычайнымі «іконамі» Божага Нараджэння, просячы ў Нованароджанага Збаўцы патрэбных ласкаў.
У адзін з калядных дзён мы наведалі Нацыянальны санктуарый Маці Божай Будслаўскай, каб перад гэтай вялікай святыняй нашага народа ўшанаваць Нованароджанага Хрыста.
Паглядзіце, якую прыгожую батлейку пабудавалі будслаўскія вернікі разам з сястрой назарэтанкай Таццянай Стасюкевіч пад кіраўніцтвам свайго пробашча ксяндз Дзмітрыя Дубовіка.
Калі вы таксама жадаеце паказаць прыгажосць сваёй парафіяльнай батлейкі, здымкі можна даслаць на электронную пошту рэдакцыі нашага парталу info@catholic.by.
Самыя прыгожыя з іх мы пастараемся апублікаваць, каб з усімі падзяліцца радасцю Нараджэння Хрыста.
