З 25 да 28 снежня ў Удзеле (Віцебская дыяцэзія, Глыбоцкі дэканат) будзе дзейнічаць жывая батлейка — месца, створанае для спакойнага, па-сапраўднаму цёплага сямейнага свята. На працягу чатырох дзён з 10 раніцы да 8 вечара ўсе жадаючыя змогуць акунуцца ў атмасферу, якая вяртае нас да нараджэння Езуса Хрыста.
Жывая батлейка адметная асаблівай атмасферай — тут не будзе шуму, а тых, хто туды прыйдзе, ахопіць пачуццё утульнасці і шчырасці. Калядная сцэна дапоўніцца жывымі жывёламі: козачкамі, трусамі, поні і ламай. Яны асабліва радуюць дзяцей, якім наведванне батлейкі запамятаецца надоўга.
Побач з батлейкай знаходзіцца кафэ з гарачай гарбатай. Таксама пакупнікоў чакае хрысціянская крама, якая прапануе вырабы і падарункі з духоўным сэнсам. Па вечарах асаблівы настрой будзе ствараць вогнішча, каля якога можна сабрацца з сям'ёй і сябрамі, каб сагрэцца, паразмаўляць і адчуць цеплыню чалавечых сэрцаў.
Жывая батлейка ў Удзеле — гэта магчымасць на некалькі гадзін спыніцца і ўзгадаць пра сапраўднае значэнне Каляд.
«Нованароджаны Езус чакае вас!»
— запэўніваюць айцы францішкане, арганізатары батлейкі.
