Пошук


09.12.2019 13:17   Тэкст: кс. Францішак Рудзь / Catholic.by

8 снежня вернікі парафіі Маці Божай Будслаўскай у Мінску (Каменная Горка) наведалі Мінскую саборную мячэць. Парафіяне даведаліся пра гісторыю мусульманскай супольнасці ў Беларусі, архітэктурныя асаблівасці культавых збудаванняў мусульман, наведалі Музей ісламу з экспанаваннем часовай выставы «Рэліквіі прарока» з Рэспублікі Дагестан.

У сучасным свеце дыялог паміж прадстаўнікамі розных рэлігій стаў адным з самых актуальных пытанняў.  Гэта падкрэсліў таксама Мітрапаліт Мінска-Магілёўскі арцыбіскуп Тадэвуш Кандрусевіч, які наведаў саборную мячэць у Мінску напярэдадні.

Мінская саборная мячэць. Фота: minsknews.by

Значным крокам з боку Касцёла ў галіне ўстанаўлення добрасуседскіх адносін з прадстаўнікамі іншых канфесій сталі дакументы Другога Ватыканскага Сабору. Аднак павага да іншых рэлігій з боку хрысціян была закладзена ўжо ў Новым Запавеце: «Са свайго боку, калі магчыма, жывіце ў спакоі з усімі людзьмі» (Рым 12, 18).

Сусветныя рэлігіі з моманту свайго заснавання таксама імкнуліся да ўсталявання згоды. У прыватнасці, паважліва ставіцца да іншых рэлігій заклікае і іслам. «Калі б Алаг пажадаў, то зрабіў бы вас адной супольнасцю, аднак Ён падзяліў вас, каб выпрабаваць вас тым, што Ён дараваў вам. Змагайцеся ў добрых справах» (Каран 05, 48).

Вывучэнне гісторыі міжканфесійных адносін даказвае рэальнасць павагі і сяброўства паміж прадстаўнікамі розных канфесій.

Вось толькі некаторыя прыклады.

У Аравіі, дзе пражываў прарок Мухамед і зарадзіўся мслам, існавалі супольнасці Умы. У іх па-добрасуседску жылі мусульмане, юдэі і хрысціяне. Хрысціяне працавалі лекарамі, архітэктарамі, сакратарамі, дарадцамі пры дварах першых халіфаў. Яны карысталіся вялікай павагай за свае веды, цярплівасць і дабрыню.

Першыя два стагоддзі ісламу, у VIII–IX ст., былі часам перакладаў хрысціянскіх Пісанняў. Існавалі каментары з Бібліі ў перакладзе на арабскую мову. Яны атрымалі назву Тафсір (каментары) і прынялі многія хрысціянскія традыцыі, закладзеныя Езусам.

Габрэі, хрысціяне і мусульмане рабілі ўнёсак у інтэлектуальнае і культурнае жыццё ісламскіх суполак. Вядома, што ў Сярэднявеччы на Пірынейскім паўвостраве і ў Паўночнай Афрыцы яны былі аб'яднаныя ў інтэлектуальную супольнасць, якая атрымала назву «залатая».

У Х ст. былі заснаваныя ўніверсітэты аль-Азхар у Каіры і Кордава ў Іспаніі. Яны сталі месцамі сумеснага навучання для навукоўцаў трох традыцый. У сусветным гандлі таксама дамінавалі гандлёвыя саюзы мусульманаў, юдэяў і хрысціянаў.

У XIV ст. іслам з’явіўся ў Беларусі. Князі старажытнабеларускай дзяржавы Вялікага княства Літоўскага запрасілі татараў з Крыма і Залатой Арды для нясення службы па ахове дзяржаўных межаў.

Неўзабаве гэтае насельніцтва атрымала роўныя правы з мясцовым. Добрасуседскія адносіны працягваюцца і па сённяшні дзень.

Прыкладаў сяброўства і павагі паміж рознымі рэлігіямі ў сусветнай гісторыі можна знайсці мноства. Усё, што трэба зрабіць кожнаму, — гэта даведацца адзін пра аднаго больш. Сучасная талерантная Беларусь — правераная шматвяковай гісторыяй традыцыя міжканфесійнай павагі, у якой Касцёл займае актыўную пазіцыю. 

Абноўлена 10.12.2019 07:58
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа