17 кастрычніка ў катэдральным касцёле Найсвяцейшага Імя Марыі ў Мінску адбыўся канцэрт, прымеркаваны да 103-й гадавіны з дня заснавання Беларускага дзяржаўнага ўніверсітэта і 90-годдзя з дня заснавання гістарычнага факультэта БДУ.
Сабраных у галоўнай каталіцкай святыні сталіцы гасцей прывітаў Старшыня Канферэнцыі Каталіцкіх Біскупаў у Беларусі арцыбіскуп Юзаф Станеўскі, Мітрапаліт Мінска-Магілёўскі. Удзел у мерапрыемстве ўзялі 150 супрацоўнікаў і студэнтаў БДУ.
Ініцыятарам мерапрыемства выступіў Рыма-Каталіцкі Касцёл у Беларусі ў знак падзякі за ініцыятыву развіцця праекта «Дыялог культур і рэлігій», скіраванага на развіццё міжканфесійнага і міжкультурнага дыялогу, падтрыманне традыцый і яднанне хрысціянства.
Канцэрт стаў своеасаблівым прыкладам для ўзаемадзеяння праз музычнае мастацтва розных канфесій з установамі адукацыі.
На канцэрце прагучалі арганныя творы Антоніё Вівальдзі, Ёгана Себасцьяна Баха і Вольфганга Амадэя Моцарта ў выкананні лаўрэата міжнародных конкурсаў Кацярыны Нікалаевай. Свае нумары прадставілі таксама першакурснікі гістарычнага факультэта Соф’я Лотыш і Васіль Мацвееў.
Працягнулася мерапрыемства ўрачыстай цырымоніяй уручэння ўзнагарод ад імя арцыбіскупа Станеўскага.
За актыўнае ўзаемадзеянне з Каталіцкім Касцёлам падзячнай граматай адзначаны рэктар БДУ Андрэй Кароль, прарэктар па ідэалагічнай і выхаваўчай рабоце БДУ Ганна Бакун, дэкан гістарычнага факультэта БДУ Аляксандр Каханоўскі, намеснік дэкана па ідэалагічнай і выхаваўчай рабоце гістарычнага факультэта БДУ Аліна Верамейчык.
У межах праекта «Дыялог культур і рэлігій» ва ўзаемадзеянні з Каталіцкім Касцёлам было праведзена больш за 50 мерапрыемстваў, у якіх узялі ўдзел звыш дзвюх тыс. студэнтаў універсітэта. Студэнты БДУ заўсёды паказваюць высокі ўзровень ведаў у галіне гісторыі рэлігій, нацыянальных традыцый і з’яўляюцца патрыётамі сваёй краіны.
Акрамя таго, памятныя падарункі ад арцыбіскупа Юзафа Станеўскага атрымалі шматдзетныя сем’і супрацоўнікаў універсітэта за іх унёсак ва ўмацаванне сямейных сувязяў, пераемнасці традыцый і каштоўнасцяў.
