15 студзеня студэнты Беларускага дзяржаўнага ўніверсітэта наведалі парафіі Маці Божай Будслаўскай і Узвышэння Святога Крыжа (Кальварыя) ў Мінску.
Візіт студэнтаў вядучай ВНУ краіны ў каталіцкія святыні адбыўся ў межах праекту «Дыялог культур і рэлігій», ініцыяванага Беларускім дзяржаўным універсітэтам. Мерапрыемствы праекту скіраваныя на вывучэнне гісторыі і традыцый вядучых канфесій Рэспублікі Беларусь, правядзенне навукова-даследчай работы ў галіне вывучэння архітэктуры і рэлігійнага жывапісу, фармавання парафіяльных архіваў, а таксама на захаванне культурна-гістарычнай спадчыны.
Касцёл у Беларусі з’яўляецца актыўным удзельнікам гэтага ўніверсітэцкага праекту.
Студэнты пазнаёміліся з гісторыяй парафій, традыцыямі Божага Нараджэння, з даследаваннямі Касцёла ў галіне гісторыі рэлігіі. Для студэнтаў была праведзена экскурсія па Кальварыйскіх могілках — самым старым захаваным каталіцкім некропалі Мінска, які апісваў у сваіх падарожных нататках яшчэ Уладзіслаў Сыракомля, вядомы літаратар і краязнаўца ХІХ стагоддзя.
У бліжэйшы час прадстаўнікі Касцёла ў Беларусі возьмуць удзел у дыскусійных пляцоўках, круглых сталах, канферэнцыях, экскурсіях і іншых мерапрыемствах у межах гэтага праекту. Вялікае значэнне будзе нададзена валанцёрскай дзейнасці.
