Фота Віталія Палінеўскага
22 кастрычніка прэзідэнт Кубы Мігель Дыяс-Канель у першы дзень свайго візіту ў Беларусь наведаў касцёл святога Сымона і святой Алены ў Мінску, дзе яго прывітаў кіраўнік беларускага каталіцкага епіскапату арцыбіскуп Тадэвуш Кандрусевіч.
Прэзідэнт разам з жонкаю пакінулі запіс у кнізе наведвальнікаў Чырвонага касцёла, а таксама паставілі запаленую свечку каля вялікай фігуры Маці Божай, якая знаходзіцца пры алтары.
Вось што напісаў Мігель Дыяс-Канель у кнізе ганаровых гасцей святыні:
«Для мяне вялікі гонар мець магчымасць наведаць такі прыгожы горад, як Мінск, быць на гэтай плошчы і ў гэтым касцёле, які захоўвае ў сабе багатую гісторыю і культуру.
Вялікі дзякуй за тое, што нас прынялі, за вашую дабрыню».
