Пошук


23.08.2019 19:16   Тэкст і фота: дк. Януш Чарнамораў / Catholic.by

21–22 жніўня ў санктуарыі ў Лагішыне адбыўся традыцыйны дыяцэзіяльны фэст з нагоды ўрачыстасці Маці Божай Каралевы Палесся, Апякункі Пінскай дыяцэзіі.

У Лагішын прыбылі шматлікія пілігрымы з розных парафій дыяцэзіі і ўсёй Беларусі. Прыйшлі пешыя пілігрымы з Баранавічаў у колькасці 160 чалавек, з Бярозы ў колькасці 220 чалавек і з Івацэвічаў — 22 чалавекі. Ужо не першы год на гэты дыяцэзіяльны фэст прыбывае з Баранавічаў таксама пілігрымка на роварах. Акрамя таго, прыехалі шматлікія пілігрымы на аўтобусах і аўтамабілях з розных куткоў Беларусі.

Цэлебрацыю начной літургіі ў вігілію ўрачыстасці Маці Божай Каралевы Палесся ўзначаліў дапаможны біскуп Пінскай дыяцэзіі Казімір Велікаселец, які сёлета адзначае 35-годдзе святарскага і 20-годдзе біскупскага служэння.

Пасля заканчэння святой Імшы шаноўнаму юбіляру выказалі шчырыя віншаванні і словы падзякі пілігрымы і парафіяне з Лагішына.

Затым адбылася працэсія са свечкамі з копіяй абраза Каралевы Палесся вакол прыкасцёльнага парку, з якім вельмі цесна звязана гісторыя цудадзейнага абраза Маці Божай Лагішынскай і былых святынь мястэчка.

Наступнымі пунктамі святкавання сталі канцэрт рэлігійных спеваў, падчас якога адбылася прэзентацыя музычнага альбома «Я — Твой», запісанага студэнтамі Вышэйшай духоўнай семінарыі ў Пінску, і малітоўнае чуванне перад абразом Маці Божай на працягу ночы.

Цэлебрацыю галоўнай Імшы ў межах урачыстасцяў узначаліў 22 жніўня дапаможны біскуп Мінска-Магілёўскай архідыяцэзіі Юрый Касабуцкі.

 

На заканчэнне фэсту пастыр Пінскай дыяцэзіі біскуп Антоні Дзям’янка падзякаваў арганізатарам урачыстасцяў, а асабліва пілігрымам, якія крочылі па прасторах Палесся да Маці Божай, за іх сведчанне веры і любові.

Таксама іерарх звярнуўся да прысутных з пастырскім словам, у якім засяродзіў увагу на неабходнасці клапаціцца пра хрысціянскі дух і выхаванне ў нашых сем’ях — падмурку будучага грамадства і Касцёла.

Абноўлена 24.08.2019 08:46
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Дух хоча жыць у нас –
мы пакліканы да вечнага жыцця