18 жніўня сотні пілігрымаў, пераважна моладзь, вырушылі з Баранавічаў і Бярозы ў санктуарый Маці Божай Каралевы Палесся ў Лагішыне, што на Піншчыне.
Першая пілігрымка з Баранавічаў выйшла ў год каранацыі папскімі каронамі цудадзейнага абраза Палескай Мадоны ў 1997 годзе, а ў 2004 годзе ўпершыню стартавала пешая пілігрымка з Бярозы.
Гэтыя духоўныя вандраванні для вернікаў з многіх парафій Пінскай дыяцэзіі, асабліва для каталіцкай моладзі, становяцца асаблівай нагодай для сумеснага сведчання аб веры і абвяшчэння Евангелля на прасторах беларускага Палесся.
На працягу чатырох дзён, з 18 па 21 жніўня, пілігрымы перажываюць своеасаблівыя рэкалекцыі ў дарозе. Вырваўшыся з віру штодзённых заняткаў, вандроўнікі з малітвай і спевам ідуць да Маці Божай праз розныя мясцовасці, становячыся адначасова сведкамі веры і любові да Бога.
Кожны вечар пілігрыма — гэта час асаблівай супольнай малітвы, дзялення радасцю веры падчас адарацый Найсвяцейшага Сакрамэнту ў касцёлах, размоваў з вернікамі, якія прымаюць на начлег, удзячнасці Богу за атрыманыя ласкі.
21 жніўня ўдзельнікі пілігрымак з Баранавічаў, Бярозы і Целяханаў збяруцца разам у лагішынскім санктуарыі, каб ушанаваць Маці Божую Каралеву Палесся.
У гэты дзень у лагішынскай святыні распачнуцца ўрачыстасці ў гонар Маці Божай Каралевы Палесся, Апякункі Пінскай дыяцэзіі.
