Пошук


20.08.2019 10:36   Ірэна Ахрамовіч / Фота: Яна Жалубоўская / Catholic.by

18 жніўня ў касцёле святога Андрэя, апостала, у Нарачы, арцыбіскуп Тадэвуш Кандрусевіч узнагародзіў аўтараў і героеў відэаролікаў, якія былі прадстаўлены на конкурс «Гісторыя нарачанскай парафіі вачыма вернікаў».

Незвычайны конкурс праводзіўся з нагоды 585-годдзя пабудовы ў Кабыльніку (сёння — вёска Нарач) першага драўлянага касцёла і 115-годдзя кансэкрацыі цяперашняй нарачанскай святыні.

Перш за ўсе мэтай конкурсу было захаваць успаміны старэйшых вернікаў, звязаныя з нарачанскай парафіяй, і перадаць іх маладому пакаленню. Таксама гэта стала добрай нагодай наведаць нашых дарагіх бабуль і паразмаўляць з імі. І гэта аказалася так цікава!

Сем гераінь распавялі перад камерай пра тое, што на ўсё жыццё захавала памяць.

Яны падзяліліся сваімі ўспамінамі з дзяцінства і маладосці. Сённяшнія юнакі і дзяўчаты даведаліся, як раней у іх парафіі адбываліся Эўхарыстычныя працэсіі, пілігрымкі і саракагадзіннае набажэнства.

З болем старэйшыя жанчыны ўспаміналі цяжкія гады пераследу веры; распавядалі пра тое, як не дазвалялі хадзіць у касцёл, як у парафіі не было святара і як, не шкадуючы сябе, яны збераглі сваю святыню ад знішчэння.

Падчас урачыстай святой Імшы, якую ў нядзелю цэлебраваў у нарачанскім касцёле Мітрапаліт Мінска-Магілёўскі арцыбіскуп Тадэвуш Кандрусевіч, нарачанцы дзякавалі Богу за тое, што ніякія варожыя моцы — ні савецкі камунізм, ні гітлераўскі нацызм, — не змаглі знішчыць веру на іх роднай зямлі і што маладое пакаленне нарачанцаў, як і іх продкі, хочуць жыць з Хрыстом і быць вернымі Яго Касцёлу.

Яны прасілі Бога аб тым, каб у нарачанскай парафіі ніколі не перарвалася повязь пакаленняў, якая сёння надзейна трымаецца на веры ў Бога — адзіным, што мае ў жыцці сапраўдную каштоўнасць і сэнс.

Даведацца пра тое, што распавялі нарачанскія бабулі, можна ТУТ>>>

Абноўлена 20.08.2019 12:11
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.