Арганізатары традыцыйнай летняй Музычнай майстэрні ў Івянцы, якая сёлета прайшла ўжо ў дваццаты раз і сабрала на тыдзень больш за 200 аматараў хрысціянскай музыкі, запрашаюць ахвотных да ўдзелу ў новым праекце — Майстэрні літургічнага спеву, запланаванай на 20–22 верасня.
Ідэя «міні-майстэрняў» (нефармальная назва праекта) заключаецца ў тым, каб праз кароткія, але рэгулярныя сустрэчы-сесіі даць тым, для каго літургічная музыка з’яўляецца крыніцай натхнення ці штодзённым служэннем, магчымасць удасканаліць свае музычныя навыкі і літургічныя веды, узбагаціцца духоўна і быць у жывым кантакце з аднадумцамі.
Правядзенне першай сустрэчы Майстэрні літургічнага спеву запланавана на выходныя 20–22 верасня і адбудзецца ў кляштары святога Антонія Падуанскага ў Івянцы (вул. Пушкіна, 1).
Арганізатары звяртаюць увагу: «Рэкамендуем запланаваць заезд у пятніцу 20 верасня, дзесьці да 19.30, паколькі духоўна-літургічная частка праграмы распачнецца ўжо ў пятніцу, а музычныя заняткі — у суботу з самай раніцы. Удзельнікам варта ўзяць у разлік і тое, што частка заняткаў пройдзе ў нядзелю. Скончыцца праграма 22 верасня прыблізна а 15-й гадзіне».
На працягу выходных удзельнікаў чакаюць заняткі па пастаноўцы голасу і практыцы харавога спеву, духоўныя канферэнцыі, кантарскі майстар-клас, супольная малітва, музычнае служэнне падчас Эўхарыстыі і Літургіі Гадзінаў.
Умовы ўдзелу
- Да ўдзелу запрашаюцца ахвотныя ва ўзросце ад 16-і гадоў. Заяўкі ад людзей малодшага ўзросту будуць аўтаматычна ануляваныя.
- У сувязі з абмежаванай колькасцю месцаў удзел магчымы выключна пасля папярэдняй анлайн-рэгістрацыі ТУТ>>> і атрымання пацвярджэння з боку арганізатараў.
Заяўку на ўдзел неабходна даслаць да 3 верасня, пацвярджэнне з боку арганізатараў будзе даслана да 8 верасня. У выпадку, калі колькасць заявак будзе перавышаць колькасць месцаў, арганізатары пакідаюць за сабой права адбору удзельнікаў, пры гэтым перавага будзе аддавацца ўдзельнікам Музычнай майстэрні 2022–2024 гадоў, выканаўцам мужчынскіх харавых партый (тэнар, бас), а таксама тым ахвотным, якія дашлюць сваю заяўку раней. - Даезд да месца правядзення мерапрыемства і зваротную дарогу ўдзельнікі арганізуюць самастойна. Пажадана прыехаць у пятніцу да 19.30, у іншых выпадках неабходна скантактавацца з арганізатарамі (электронная пошта: muzmajsternia@yandex.by; Instagram: @muzmajsternia).
- Пражыванне і харчаванне ўдзельнікаў забяспечваюць арганізатары.
- Удзельнікі атрымаюць увесь неабходны нотны матэрыял на месцы. Рэкамендавана ўзяць з сабой алоўкі і нататнікі, а таксама спеўнікі (па жаданні).
- Ахвяраванне на арганізацыйныя выдаткі складаецца ў дабравольным памеры.
Наступная сесія Майстэрні літургічнага спеву плануецца ў лістападзе або снежні 2024 года.
