14 лістапада выпускнік Міждыяцэзіяльнай вышэйшай духоўнай семінарыі ў Гродне дыякан Дзмітрый Малец прыме сакрамэнт пасвячэння ў ступені прэзбітэрату.
Як паведамляе Grodnensis.by, пасвячэнне ўдзеліць біскуп Гродзенскі Аляксандр Кашкевіч у катэдральным касцёле св. Францішка Ксавэрыя ў Гродне.
Святая Імша, падчас якой адбудзецца пасвячэнне, пачнецца ў 12.00.
Будзе весціся яе прамая трансляцыя на Youtube-канале гродзенскай катэдральнай парафіі.
Дыякан Дзмітрый Малец нарадзіўся 18 чэрвеня 1996 г., паходзіць з парафіі Святой Сям’і ў Лідзе. Дыяканскае пасвячэнне прыняў 16 лістапада 2019 г., ва ўрачыстасць Найсвяцейшай Панны Марыі Вастрабрамскай, галоўнай Апякункі Гродзенскай дыяцэзіі.
Потым быў скіраваны на служэнне ў санктуарый Маці Божай Каралевы нашых сем’яў у Тракелях. У апошні час служыў у гродзенскай катэдры.
Прэс-служба Гродзенскай дыяцэзіі заахвочвае да асаблівай малітвы за дыякана, які прыме пасвячэнне, каб ён мoг як найлепш падрыхтавацца да гэтай падзеі, а ў будучыні быў добрым Божым святаром.
