19 кастрычніка Касцёл згадвае благаслаўлёнага мучаніка ксяндза Ежы Папялушку, які быў забіты камуністычнымі агентамі за тое, што вучыў людзей хрысціянскім паводзінам не толькі ў асабістым, але і ў грамадскім жыцці.
Касцёл стагоддзямі вучыць вернікаў, што нельга быць хрысціянінам напалову, нельга адначасова маліцца і верыць дома і ў храме, але падманваць, красці ці мірыцца з хлуснёй і прыгнётам на працы ці на вуліцы.
Асабліва гэтая ідэя стала актуальнай у краінах, якія апынуліся пад уладай дыктатарскіх рэжымаў, як камуністычных, гэтак і нацысцкіх. Аднак калі нацызм быў пераможаны ў 1945 годзе, Усходняя Еўропа заставалася пад уладай камуністаў, пакуль у 1991 годзе не распаўся Савецкі Саюз.
У суседняй з Беларуссю Польшчы камуністы захоўвалі ўладу да 1989 года. У краіне адсутнічала свабода прэсы, тэлебачанне перадавала толькі камуністычную прапаганду, выбары былі чыста фармальнымі, абмяжоўвалася свабода сходаў і веравызнання. Тыя, хто спрабаваў адкрыта выказаць пратэст, гублялі працу, траплялі ў турмы, а часам і гінулі. Польшча перажывала ўсё больш глыбокія эканамічныя праблемы.
Ксёндз Ежы ў 1980 годзе быў 33-гадовым святаром, які стаў служыць у Варшаве. Ён вучыў людзей быць сапраўднымі хрысціянамі ва ўсіх сферах свайго жыцця, падтрымліваў іх маральны дух, калі дзяржаўныя СМІ пашыралі хлусню, што ўсе незадаволеныя камуністамі — агенты ЗША.
Ягоным дэвізам сталі словы апостала Паўла з Паслання да Рымлянаў: «Не будзь пераможаны злом, але перамагай зло дабром» (Рым 12, 21).
Блізкімі яму былі таксама словы Папы Яна Паўла ІІ, якія той сказаў у 1980 годзе, працытаваўшы падчас візіту ў яшчэ камуністычную Польшчу евангельскія словы Хрыста: «Не бойцеся».
Ксёндз Ежы, які ў сям'і размаўляў на падляскім дыялекце беларускай мовы, дапамагаў пакутуючым ад рэпрэсій камуністаў, складаў і прамаўляў гаміліі, на якія збіраліся тысячы чалавек, каб паслухаць слова надзеі і ўмацавацца ў веры насуперак атэістычнай прапагандзе.
Ён казаў пра тое, што свабода — неад'емнае права дзяцей Божых, а сапраўднае шчасце іх у тым, каб жыць у згодзе з Божымі запаведзямі і быць змагарамі за праўду.
Супраць ксяндза, як і супраць самога Папы Яна Паўла, пачалі працаваць камуністычныя спецслужбы і прадажныя дзяржаўныя журналісты — іх мэтай было сфабрыкаваць і распаўсюдзіць хлусню пра быццам бы існаваўшыя сувязі з замежнымі спецслужбамі, а таксама падарваць іх маральны аўтарытэт.
Усе гэтыя намаганні былі марнымі.
Аднак калі Папа Ян Павел быў для камуністаў недасяжны, то ксёндз Папялушка — быў зусім побач. 13 кастрычніка адбылася першая, няўдалая, спроба агентаў Службы Бяспекі забіць святара.
19 кастрычніка ксёндз Ежы прыбыў па запрашэнні Душпастырства працоўных у Быгдашч. Вечарам, калі ён на машыне вяртаўся ў Варшаву, афіцэры спецслужб спынілі і захапілі святара. Яны доўга збівалі і катавалі яго, а потым мёртвае цела выкінулі ў раку. Зараз імёны і чыны забойцаў, а таксама тых, хто аддаваў загад, вядомыя.
На пахаванне ксяндза Ежы прыйшлі тысячы людзей.
Ужо 5 лістапада людзі пачалі пісаць лісты і прасіць Касцёл пачаць працэс беатыфікацыі мучаніка. Афіцыйны працэс пасля доўгіх гадоў падрыхтоўкі пачаўся ў 1997 годзе, а ў 2010 годзе ксёндз Ежы быў абвешчаны благаслаўлёным.
Зараз ідзе працэс кананізацыі.
Быгдашч. Адзін з першых помнікаў кс. Ежы быў пастаўлены тут у 1985 годзе, нягледзячы на вялікія перашкоды з боку ўладаў.
Святы ксёндз Ежы, маліся за беларускіх хрысціян і ўсіх хрысціян свету, каб мы былі такімі ж смелымі ў абароне свабоды і годнасці дзяцей Божых, якім быў ты!
Аляксандр Гелагаеў
