Завяршыліся юбілейныя ўрачыстасці ў Будславе, куды крочылі пілігрымы з розных мясцін Беларусі, каб ушанаваць Найсвяцейшую Панну Марыю і з вялікім даверам узнесці свае малітвы: падзякі і просьбы да Бога Айца Усемагутнага праз Яе заступніцтва. І сёння час, каб паразважаць над цнотамі Божай Маці, нашай апякункі, у якой мы шукаем падтрымкі і паратунку.
У гэты Юбілейны Год Божай Міласэрнасці, перагортваючы старонкі духоўнага Дзённіка «Божая міласэрнасць у маёй душы», сэрца проста прагне засяродзіць увагу на цудоўнай малітве святой сястры Фаўстыны (гл. Дз. 161): О Марыя, Беззаганная Дзева,
Чысты крышталь сэрца майго,
Ты — сіла мая, о моцны якар,
Ты — шчыт мой і абарона для сэрца слабога.О Марыя, Ты — чыстая і непараўнальная,
Ты — Дзева і разам з тым Маці,
Ты, як сонца, прыгожая, Ты — беззаганная,
Нішто не параўнаецца з вобразам душы Тваёй.Хараство Тваё захапіла позірк Тройчы Святога,
І Ён сышоў з неба, пакідаючы трон спрадвечнай сталіцы,
І прыняў цела і кроў з Сэрца Твайго,
І дзевяць месяцаў утойваўся ў Сэрцы Дзявіцы.О Маці, Дзева, ніхто не разумее таго,
Што Бог неабсяжны стаў чалавекам,
Гэта толькі памкненне любові і бязмежнай міласэрнасці Яго,
Праз Цябе, Маці, дадзена нам жыць з Ім навекі.О Марыя, Маці, Дзева і Брама нябесная,
Праз Цябе прыйшло для нас збаўленне,
Усялякая ласка праз Твае рукі на нас сплывае,
Толькі вернае наследаванне Цябе мяне асвячае.О Марыя, Дзева, Лілея найпрыгажэйшая,
Сэрца Тваё для Езуса было першым табэрнакулюмам на зямлі,
І гэта таму, што пакора Твая — найглыбейшая,
І таму Ты ўзнесена вышэй за хоры анёльскія і вышэй за святых.О Марыя, мая мілая Маці,
Аддаю Табе душу, цела і беднае сэрца маё.
Будзь ахоўніцаю жыцця майго,
Асабліва ў гадзіну смерці, у апошнім змаганні.
Святая сястра Фаўстына цалкам аддалася ў рукі сваёй духоўнай Маці — даверыла сваё жыццё і ўсё тое, што пасля яго настане. Гэта павінна стаць і для нас, дзяцей Божых, асаблівай ласкай — прысвяціць сябе без рэшты Найсвяцейшай Панне Марыі, у паўнаце даверыцца Ёй; сэрцам, душой і розумам усклікнуць сёння: «Totus Tuus».
Найсвяцейшая Панна Марыя —
Узор святасці і чысціні!
Ты прымі нашы просьбы нізкія
І да Сэрца свайго прыгарні…
Крочым мы да будслаўскай святыні –
Свае сэрцы прыносім Табе.
Ты нас чуеш, святая Матуля,
Не пакінь жа Ты нас у журбе!
Мы з даверам ідзем к Табе сёння,
Каб падзякаваць за дар жыцця
І схіляем галовы ў пакоры,
Каб спазнаць сэнс святога жыцця,
Каб наследаваць Боскія цноты:
Тваю святасць і чысціню,
Сілкавацца святою любоўю,
Ажывіць зноў надзею сваю,
Умацаваць нашу слабую веру –
Кожны дзень каб духоўна ўзрастаць.
Найсвяцейшая Панна Марыя,
Бога прагнем мы сэрцам услаўляць!
Беззаганная Божая Маці —
Узор святасці і чысціні!
Усклікаюць к Табе пілігрымы:
— Нас да Сэрца свайго прыгарні!..
Апрацавала Анастасія-Алена Блусянкова
