З 15 па 17 лістапада пры парафіі святога Міхала Арханёла ў Навагрудку (Гродзенская дыяцэзія) ў чацвёрты раз прайшоў малітоўны кангрэс у абарону жыцця і сям’і.
Мэтай яго правядзення было пакаянне за грахі беларускага народа супраць жыцця і сям’і.
Арганізатарамі мерапрыемства выступілі дабрачынны фонд «Адкрытыя сэрцы», Экспертная рада па справах абароны жыцця і сям’і Мінска-Магілёўскай архідыяцэзіі і навагрудская парафія святога Міхала Арханёла.
На кангрэсе сабраліся актывісты руху ў абарону жыцця, члены сямейных малітоўных рухаў, вернікі, якія практыкуюць духоўнае ўсынаўленне (малітву за ненароджаных на працягу дзевяці месяцаў), і проста людзі, якія пажадалі прычыніцца да справы абароны жыцця і сям’і.
У суботу 16 лістапада, ва ўспамін Найсвяцейшай Панны Марыі Вастрабрамскай, Маці Міласэрнасці, каля 80-і чалавек прайшлі ў пілігрымцы пакаяння з Навагрудка ва Уселюб. Яны неслі ў руках белыя крыжы — сімвал забітых ва ўлонні маці дзяцей.
Увечары таго ж дня ў Навагрудку цэлебрацыю святой Імшы ў інтэнцыі абароны жыцця ўзначаліў Старшыня Канферэнцыі Каталіцкіх Біскупаў у Беларусі арцыбіскуп Юзаф Станеўскі, Мітрапаліт Мінска-Магілёўскі. На заканчэнне Эўхарыстыі іерарх прачытаў урачысты малітоўны Акт пакаяння беларускага народа за грахі супраць жыцця і сям’і.
«У нашай краіне ўжо 101 год, з 18 лістапада 1920 года, легальна забіваюцца дзеці ва ўлонні маці. Кожны дзень у Беларусі толькі з прычыны абортаў гінуць больш за 50 хлопчыкаў і дзяўчынак, не кажучы пра знішчэнне эмбрыёнаў праз спіралі, гарманальныя сродкі і падчас ЭКА. Таму ў наш час асаблівым чынам „неабходная вялікая малітва за жыццё, якая ідзе праз увесь свет“ (святы Ян Павел ІІ, Evangelium Vitæ, 100)», — адзначаюць арганізатары кангрэсу.
Апошні дзень кангрэса быў прысвечаны малітве і выступленням, якія датычыліся выхавання дзяцей, айцоўства, пераадолення духоўных пагроз для сям’і.
