18 лістапада вікарый парафіі Узвышэння Святога Крыжа ў Лідзе (Гродзенская дыяцэзія, Лідскі дэканат) ксёндз Андрэй Скамарошка абараніў доктарскую дысертацыю па тэалогіі.
Як паведаміла Прэс-служба Гродзенскай дыцэзіі Grodnensis.by, дысертацыю ксёндз Андрэй пісаў у Вармінска-Мазурскім універсітэце ў Ольштыне (Польшча) на тэму «Евангелізацыйнае вымярэнне літургіі Праваслаўнай Царквы». Каталіцкі святар засяроджвае ў ёй увагу на значэнні літургіі ў справе евангелізацыі ў Праваслаўнай Царкве з перспектывы міжканфесійнага супрацоўніцтва ў абвяшчэнні свету Добрай Навіны аб збаўленні.
Тэма дысертацыі базуецца на прынцыпе, што літургія — гэта цэнтральны элемент евангелізацыйнай місіі Праваслаўя. Навуковая праца змяшчае адказ на пытанне, як Праваслаўная Царква выкарыстоўвае літургію для абвяшчэння Евангелля ў сённяшнім свеце. Таксама ў ёй паказана, як літургія ўводзіць людзей у досвед прысутнасці Бога, што ўмацоўвае іх веру і натхняе дзяліцца ёю з іншымі.
Навуковая праца заахвочвае да паглыблення экуменічнага дыялогу і разважання над тым, якія евангелізацыйныя стратэгіі былі б паспяховымі ў кантэксце сучасных выклікаў, маючы на ўвазе літургію як метад выхавання сведкаў Евангелля і будаўніцтва касцёльнай камуніі.
Навуковым кіраўніком у вядзенні даследавання і ў напісанні працы быў ксёндз Рышард Гайдук CSsR.
На абароне дысертацыі прысутнічалі сярод іншых біскуп Гродзенскі Уладзімір Гуляй, Часовы павераны ў справах Святога Пасаду ў Беларусі ксёндз прэлат Кшыштаф Сэрока, некалькі святароў Гродзенскай дыяцэзіі. Менавіта яны першымі маглі павіншаваць новага доктара тэалогіі, які ўзбагаціць сваімі ведамі Касцёл у Беларусі.
