Тры колеры і шэсць сімвалаў увасобілі подых Духа, які будзе спадарожнічаць Сусветным дням моладзі, што з 22 па 27 студзеня пройдуць у Панаме.
Аўтар лагатыпа — панамская студэнтка
Як паведамляе італьянская рэдакцыя партала Vatican News, пяшчота і адданасць Марыі кіравалі рукой Амбар Кальва (Ambar Calvo), студэнткі факультэта архітэктуры панамскага ўніверсітэта, якая стала аўтаркай лагатыпа сёлетніх Сусветных дзён моладзі.
Тры колеры — чырвоны, сіні і блакітны — сімвалізуюць любоў і цярпенне Хрыста, плашч Панны Марыі, Ціхі акіян, Карыбскае мора, а таксама колеры нацыянальнага сцяга Панамы.
Бязмежная любоў Марыі
Простыя абрысы літары «М», пераходзячы ў сэрца, выяўляюць бязмежную любоў Маці Божай да ўсяго чалавецтва.
Сапраўдны герой лагатыпа СДМ 2019 — Марыя, чый сілуэт з’яўляецца ўвасабленнем пяшчоты ў момант Зачацця Дзіцяці Езуса.
Крыж пілігрымаў
Выкананы ў чырвоным колеры «Крыж пілігрымаў» — сімвал і сведчанне вандроўнага шляху па планеце Сусветных дзён моладзі, якія пачалі праводзіцца з нагоды Юбілею Адкуплення ў 1984 г. па ініцыятыве св. Яна Паўла ІІ.
Дарога насустрач Езусу
Малюнак адлюстроўвае таксама месца правядзення сустрэчы моладзі з усяго свету: геаграфічны абрыс Панамскага канала і перашыйка ўпісаны ў М-падобнае сэрца лагатыпа.
Паводле задумы Амбар, цела Марыі — гэта таксама «дарога насустрач Езусу, а Панама вядзе да Яго ў 2019 годзе».
Невялікія белыя кропкі ў правай верхняй частцы малюнка — гэта сімвал кароны Нябеснай Валадаркі, якія таксама азначаюць шматлікіх пілігрымаў, якія прыбываюць у Панаму з розных кантынентаў, у тым ліку і з Беларусі.
