Благаслаўлёны Оскар Арнульфо Рамэра-і-Гальдамес, кананізацыя якога пройдзе ў кастрычніку ў Ватыкане, стане адным з апекуноў бліжэйшых Сусветных дзён моладзі.
У Панаму, дзе ў студзені 2019 г. адбудзецца буйнейшы каталіцкі моладзевы форум, ужо была дастаўлена рэліквія благаслаўлёнага арцыбіскупа. Пастыр мясцовага Касцёла арцыбіскуп Хасэ Дамінго Улоа Мэндзіета атрымаў яе з рук пастулатара кананізацыйнага працэсу сальвадорскага святара кс. Рафаэля Уруціі.
Гаворка ідзе пра маленькі фрагмент рэбернай косткі бл. Оскара Рамэра, якая была вынята падчас аўтапсіі цела пасля яго забойства ў 1980 г. Гэта — першая рэліквія благаслаўлёнага, якая пакінула тэрыторыю Сальвадора. Рэліквія будзе выстаўлены ў панамскім катэдральным касцёле, які падчас візіту на Сусветныя дні моладзі наведае папа Францішак.
Цэнтральныя падзеі Сусветных дзён моладзі пройдуць 22–27 студзеня 2019 г.
Іх дэвізам стануць словы Панны Марыі: «Вось я, слуга Пана. Няхай мне станецца паводле твайго слова» (пар. Лк 1, 38). Для ўдзелу ў форуме ўжо зарэгіставалася каля 600 тыс. чалавек з Паўднёвай і Паўночнай Амерыкі, а таксама шматлікія дэлегацыі з Еўропы, Афрыкі, Акіяніі і Азіі.
Арцыбіскуп Сан-Сальвадора Оскар Арнульфо Рамэра-і-Гальдамес вядомы як мужны пастыр і абаронца бедных. Ён быў беатыфікаваны ў маі 2015 г. у горадзе Сан-Сальвадор, дзе выконваў сваё пастырскае служэнне і дзе быў забіты з нянавісці да веры падчас св. Імшы, якую цэлебраваў у мясцовым шпіталі.
Аб кананізацыі арцыбіскупа Рамэра папа Францішак абвясціў падчас Звычайнага публічнага кансісторыя па кананізацыйных справах, які прайшоў у Ватыкане 19 ліпеня.
