Бельгійкі кароль Філіп І і яго жонка Мацільда разам з дзецьмі і групай сяброў пройдуць шляхам св. Якуба ў Санцьяга дэ Кампастэла.
Пілігрымка носіць прыватны характар: каралеўская сям’я будзе ісці т. зв. «французскім» шляхам (Каміна дэ Санцьяга Франс) — адным з самых папулярных шляхоў, які пачынаецца ў Пірэнеях.
Як паведамляе іспанскі часопіс El Pais, у сераду 4 красавіка каралеўская сям’я ўжо пераадолела 30 кіламетраў. Абое сужонкаў такім чынам працягваюць свой мінулагодні вопыт, калі яны прайшлі частку французскага шляху да магілы св. Якуба.
Летась разам з двума сынамі Габрыэлем і Эмануэлем яны пераадолелі гэты кавалак трасы ў перыяд Пасхальнага Трыдууму і Велікоднай ночы.
Французскі шлях св. Якуба з 1993 года ўнесены ў спіс ЮНЕСКА. Яго адлегласць у розных крыніцах ацэньваецца ад 754 да 818 км.
