26 верасня Святы Айцец Папа Францішак распачаў сваё 46-е Апостальскае падарожжа, у межах якога наведае дзве невялікія еўрапейскія краіны: Люксембург і Бельгію.
Як паведаміла Беларуская рэдакцыя парталу Vatican News, у чацвер раніцай Пантыфік прыбыў з Ватыкана ў рымскім аэрапорт Ф’юмічына, адкуль вылецеў у кірунку першага этапу сваёй пілігрымкі — Люксембруга.
Візіт у гэтую краіну будзе аднадзённым. Ён пройдзе пад дэвізам «У дарогу, з надзеяй» (En route, avec еspérance — фр.).
Перад гэтым, увечары 25 верасня, Папа па традыцыі наведаў рымскую базыліку Святой Марыі Вялікай, каб у малітве перад абразом Маці Божай Salus Populi Romani даверыць падарожжа апецы Багародзіцы.
За дзве гадзіны палёту самалёт з Папам на борце пераадолеў у паветры 1170 кіламетраў над тэрыторыямі пяці краін: Італіі, Аўстрыі, Германіі, Бельгіі і Люксембурга.
Лайнер прызямліўся ў міжнародным аэрапорце Фіндэл каля 10-й гадзіны, дзе адбылася кароткая цырымонія прывітання. Святога Айца сустрэлі Вялікі Герцаг Люксембуржскі Анры, яго жонка Вялікая Герцагіня Марыя-Тэрэза, прэм’ер-міністр Люксембурга Люк Фрыдэн, прадстаўнікі мясцовага духавенства на чале з арцыбіскупам Люксембуржскім кардыналам Жанам-Клодам Ольрышам і моладзь.
Як адзначаецца ў паведамленнях інфармацыйных агенцтваў пра пачатак гэтага апостальскага візіту ў Люксембург, пасля пералёту 87-гадовы Папа выглядаў стомленым.
Два тыдні таму ён завяршыў сваё самае доўгае апостальскае падарожжа па краінах Азіі і Акіяніі, пасля чаго перанёс лёгкі грып. Тым не менш Святы Айцец не палічыў неабходным адмяніць свой запланаваны візіт у дзве краіны Бенілюкса.
Пасля цырымоніі прывітання Папа Францішак скіраваўся на візіт ветлівасці да Вялікага Герцага, пасля чаго сустрэнецца з прэм’ер-міністрам краіны, прадстаўнікамі ўлады, грамадзянскай супольнасці і дыпламатычнага корпусу, да якіх звернецца з прамовай.
У другой палове дня запланавана сустрэча Святога Айца з каталіцкай супольнасцю краіны. Яна адбудзецца ў катэдры Нотр-Дам у Люксембургу.
Пасля звароту да мясцовых вернікаў і духавенства і кароткай цырымоніі развітання ў аэрапорце Фіндэл Папа Францішак вылеціць у Бельгію.
Галоўныя сустрэчы ў межах візіту у гэту краіну пройдуць у пятніцу 27 верасня.
