З 10 па 12 снежня ў Люксембургу адбылася сустрэча юрыдычных кансультантаў Рады Канферэнцый Біскупаў Еўропы (РКБЕ). Ад Канферэнцыі Каталіцкіх Біскупаў у Беларусі ў ёй прымаў удзел кс. Дзмітрый Пухальскі, канцлер курыі Мінска-Магілёўскай архідыяцэзіі. Узначаліў сустрэчу старшыня Рады кардынал Анджэло Баньяска.
Падчас сустрэчы былі абмеркаваны актуальныя праблемы, з якімі сустракаецца Касцёл у Еўропе на сённяшні дзень — гэта эўтаназія, праблема мігрантаў і ўплыў дзяржаўных ідэалогій на жыццё Каталіцкага Касцёла.
Кожны з прадстаўнікоў Канферэнцый Біскупаў Еўропы прадставіў асноўныя моманты заканадаўства сваёй краіны, якое датычыць гэтых пытанняў. Таксама кс. Дзмітрый Пухальскі прадставіў асноўныя нормы беларускага заканадаўства па дадзеных пытаннях.
Асаблівую зацікаўленасць у прысутных выклікалі ўнікальныя нормы беларускага заканадаўства, звязаныя з займаннем рэлігійнай дзейнасцю і інстытутам Упаўнаважанага па справах рэлігій і нацыянальнасцяў.
Кардынал Анджэло Баньяска, падводзячы вынікі сустрэчы, звярнуў увагу на тое, што Касцёл не можа заставацца збоку ў дыскусіі па такіх важных пытаннях для ўсяго еўрапейскага грамадства. Неабходна выкарыстоўваць усе магчымыя сродкі для таго, каб жыхары еўрапейскага кантынента таксама чулі і ведалі голас Касцёла па гэтых пытаннях.
Таксама ўдзельнікі сустрэчы наведалі Еўрапейскі Суд, які знаходзіцца ў Люксембургу.
