15 сакавіка ў Рыме стартаваў паказ жывога шоу (live show) пад назваю «Апошні Суд. Мікеланджэла і сакрэты Сікстынскай капэлы» (Giudizio Universale. Michelangelo and the secrets of the Sistine Chapel).
Славуты шэдэўр мастацтва, створаны ў XVI ст. непараўнальным майстрам Адраджэння, які ўпрыгожвае месца правядзення Канклаваў і на працягу ўжо амаль пяці стагоддзяў натхняе шматлікіх мастакоў, пісьменнікаў і рэжысёраў, сёння стаў аб’ектам зусім новай формы мастацтва — жывога шоу.
З дапамогаю лічбавых тэхналогій глядач як быццам занураецца ў працэс стварэння шэдэўра.
Рэалізаваў незвычайны праект Марко Баліч, аўтар вялікіх алімпійскіх шоу ў Рыа-дэ-Жанэйра і ў Сочы.
Арыгінальнае музычнае афармленне праекту напісана Стынгам, цудоўным знаўцам музыкі Адраджэння, а таксама прызнаным майстрам у сферы поп- і рок-музыкі. Крэатыўныя знаходкі стваральнікаў відэагульняў у спалучэнні з кампетэнтнымі кансультацыямі экспертаў Ватыканскіх музеяў адносна неўміручых фрэсак Мікеланджэла зрабілі магчымым рэалізацыю шоу, у якім спалучаюцца і ўзаемадапаўняюцца разнастайныя візуалізацыйныя тэхнікі новага віду мастацтва, што атрымала назву Artainment (ад англійскіх словаў Art — мастацтва і Entertainment — забава).
