![](/3/images/news/2024/07/2024-07-16-vatican-gardens-tour.jpg)
Ватыканскія музеі пашырылі прапанову для сем’яў з дзецьмі: з мінулай суботы, 13 ліпеня, у Ватыканскіх садах дзейнічае новы маршрут, мэта якога — пазнаёміцца з прыгажосцю створанага свету ў духу энцыклікі Папы Францішка Laudato si'.
Як паведаміла Беларуская рэдакцыя парталу Vatican News, маршрут прызначаны для сем’яў з дзецьмі ва ўзросце ад 6-і да 12-і гадоў. Прайсціся ім можна па папярэднім запісе кожную суботу да 26 кастрычніка. Гіды праводзяць экскурсіі на італьянскай і англійскай мовах.
Дзеці адкрыюць для сябе «зялёныя лёгкія» Ватыкана пад кіраўніцтвам экспертаў у галіне батанікі і гісторыі мастацтва.
Маршрут спалучае ў сабе прыроду, мастацтва і веру. Яны даведаюцца пра любімыя месцы Пантыфікаў, якія шпацыравалі па Ватыканскіх садах, і навучацца пазнаваць як папскія гербы, так і расліны, якія сустракаюцца ў Святым Пісанні.
Запланаваныя майстар-класы, гульні і мерапрыемствы, у тым ліку пошукі скарбаў і чарапах, якія жывуць у Ватыкане. Як гаворыцца ў прэс-рэлізе Ватыканскіх музеяў, гэта будзе «сапраўднае навучанне на свежым паветры, сумеснае развіццё ўсведамлення прыгажосці і абароны нашага агульнага дома».
Маршрут таксама даступны для людзей з абмежаванымі магчымасцямі.
Пасля экскурсіі можна будзе самастойна і без дадатковай платы наведаць Ватыканскія музеі.