Ватыканскія музеі рыхтуюцца да рэарганізацыі парадку наведвання турыстамі. Сёння ў распараджэнні турыстаў — сямікіламетровая траса з магчымасцю наведаць самыя разнастайныя экспазіцыі.
Аднак большасць з турыстаў абірае найкарацейшую дарогу наўпрост да Сікстынскай капэлы, ігнаруючы іншыя музейныя залы, якія ў выніку застаюцца не такімі запатрабаванымі.
Дырэктар Ватыканскіх музеяў Барбара Ята праанансавала «падрыхтоўку новага ўвахода ў Музеі ўздоўж муроў Сангала».
«Праз гэтую новую браму можна будзе патрапіць ў тыя часткі Музеяў, якія карыстаюцца меншым попытам. Такім чынам мы зможам лепш раздзяліць наплыў турыстаў, некаторыя з якіх наведваюць Рым адзін раз у жыцці і не маюць магчымасці патрапіць у Музеі з-за вялікай колькасці наведвальнікаў», — адзначыла Ята.
Па яе словах, новы ўваход дазволіць накіроўваць турыстаў і ў менш запоўненыя часткі Музеяў, у якіх выстаўлены не толькі прадметы мастацтва, але і шматвяковыя сведчанні хрысціянскай веры.
Ватыканскія музеі заснаваны папам Юліем II на пачатку XVI ст. У іх склад уваходзіць знакамітая Сікстынская капэла з роспісамі Мікеланджэла. На працягу года тут прымаюць каля 6 млн наведвальнікаў. Музеі ўваходзяць у дзясятку самых папулярных у свеце і налічваюць 54 галерэі.
