Колькасць нападаў на хрысціян у Індыі ў 2017 годзе павялічыся ў два разы. У мінулым годзе тут было зафіксавана 736 такіх выпадкаў, у той час як два гады таму іх было 348.
Пра гэта са спасылкай на азіяцкае каталіцкае агенцтва Ucanews паведамляе KAI.
Рост агрэсіі справакаваны ў тым ліку адносінамі да хрысціян як да ворагаў краіны з боку індуісцкіх нацыяналістаў. У кожным выпадку хрысціяне інфармавалі паліцыю пра рэлігійную неталерантнасць, дыскрымінацыю або абразлівае стаўленне да святых для католікаў месцаў.
«Абвінавачваць хрысціян у сур’ёзных злачынствах — гэта новая тэндэнцыя», — адзначае заснавальнік арганізацыі Persecution Relief Шыбу Томас.
У 2017 годзе выпадкі пераследу хрысціян былі зафіксаваны ў 24 індыйскіх штатах з 29 існуючых.
Выпадкі нападу на хрысціян і мусульман у Індыі значна выраслі пасля прыходу да ўлады ў 2014 годзе нацыяналістычнай Індыйскай народнай партыі (ІНП).
У 2018 годзе ў васьмі штатах пройдуць выбары ў мясцовыя парламенты. У трох з іх большасць на сёння складаюць хрысціяне. Прыхільнікі ІНП кіруюць у 18 з 29 індыйскіх штатаў. Вясной 2019 года ў Індыі пройдуць выбары ў дзяржаўны парламент.
