Сёлета на свята Маці Божай з Люрда, якое адзначаецца 11 лютага, прыпадае 160-я гадавіна першага аб’яўлення Марыі св. Бэрнардэце Субіру ў гэтым французскім мястэчку. У той жа дзень будзе адзначацца 26-ы Сусветны дзень хворых. У сувязі з гэтым з’явілася магчымасць праз інтэрнэт запаліць свечку на месцы аб’яўленняў 1858 г. — у Масаб’ельскай пячоры.
Рэктар санктуарыя кс. Андрэ Каб нагадвае, што падчас большасці аб’яўленняў св. Бэрнардэта прыходзіла ў Масаб’ельскую пячору са свечкай у руцэ. З таго часу запальванне свечак у Люрдзе, асабліва з малітваю за хворых, стала мясцовай традыцыяй.
Цяпер ёсць магчымасць здзейсніць гэты знак з нагоды Сусветнага дня хворых і свята Маці Божай з Люрда з думкаю пра нашых блізкіх, якія хварэюць або перажываюць унутраны боль. Менавіта за іх, пачынаючы з 11 лютага 2018 г., можна паставіць і запаліць свечку ў люрдскім санктуарыі, а тыя, у чыёй інтэнцыі гэта будзе зроблена, змогуць пра гэта даведацца, атрымаўшы з Люрда адпаведны ліст на электронную пошту (па жаданні).
Замовіць і запаліць свечку можна на інтэрнэт-старонцы санктуарыя ў Люрдзе (тут), пералічыўшы за гэта ахвяраванне (не менш за 4 еўра) з дапамогай банкаўскай карткі непасрэдна на старонцы санктуарыя або праз сістэму PayPal.
Сервіс даступны на французскай, англійскай, іспанскай, італьянскай, нямецкай і нідэрландскай мовах.
