Папа Францішак спыніў картэж і затрымаўся каля служачай аховы парадку карабінераў Чылі, якую скінуў з сядла спалоханы конь.
Інцыдэнт адбыўся ў той час, калі «папамабіль» рухаўся па вуліцах горада Ікіке пасля святой Імшы, якую Святы Айцец цэлебраваў для мясцовага насельніцтва ў кампусе Лабіта. Адна са служачых падраздзялення аховы парадку карабінераў Чылі звалілася з каня, і Папа застаўся з ёю, каб падтрымаць яе, пакуль ёй аказвалі першую дапамогу.
Доўгі аўтамабільны картэж ехаў паміж хмарачосамі і акіянам, па абодвух баках натоўпы воклічамі віталі Папу, і тысячы галасоў зліваліся з ровам матацыклаў суправаджэння і шумам ад верталёта, які варажыраваў у паветры. Гэта, відаць, і напалохала каня — дастаткова палахлівую жывёлу, — які скінуў з сябе служачую аховы парадку карабінераў Чылі.
Усё здарылася ў адзін момант. Конь, якога ўтрымлівалі за аброць двое пешых карабінераў, раптам узняўся на дыбкі, скінуўшы з сябе служачую — маладую жанчыну, якая, выпаўшы з сядла, ударылася аб «папамабіль». Святы Айцец адрэагаваў вокамгненна: ён загадаў шафёру спыніцца і пешкі вярнуўся да жанчыны, да якой ужо спяшаліся з дапамогай.
Дактары з суправаджэння Папы неадкладна аказалі першую дапамогу і сцвердзілі наяўнасць усіх жыццёва важных функцый жанчыны. Сама служачая дала зразумець, што ўсё абышлося не найгорш. Неўзабаве прыбылі чылійскія медыкі, якія даставілі жанчыну ў шпіталь.
У гэтым непрыемным здарэнні вельмі яскравым было хрысціянскае сведчанне Святога Айца, які сам падышоў, каб пацікавіцца станам пацярпелай, і падтрымліваў яе ўвесь час, пакуль ёй аказвалі першую дапамогу.
