Упершыню Папа Рымскі цэлебраваў сакрамэнт сужэнства ў самалёце. Папа Францішак благаславіў шлюбны саюз сцюардэсы і бортправадніка чылійскай авіякампаніі Latam падчас пералёту з Сант’яга ў Ікіке.
Пра гэта паведаміў дырэктар прэс-службы Ватыкана Грэг Бурке, які ляцеў тым самым рэйсам разам з Папам.
Незвычайны сакрамэнт сужэнства адбыўся на вышыні 36 тысяч футаў над зямлёй (каля 11 кіламетраў). Сужэнцы — 39-гадовая Паўла Падэста Руіс і 41-гадовы Карлас Куфанда Элар’яга — ужо мелі грамадзянскі шлюб і збіраліся заключыць сакрамэнт сужэнства ў Касцёле, аднак спачатку з-за землятрусу 2010 г., а потым з-за іншых перашкодаў былі вымушаны адкласці вяселле.
«Гэта вялікая радасць. Нас шлюбаваў Папа ў самалёце: не можа быць нічога прыгажэй за гэта для двух людзей, якія кахаюць адно аднаго, — падзяліўся ўражаннямі Карлас Куфанда Элар’яга. — Усё адбылося нечакана, гэта зусім не было падрыхтавана. Папа выслухаў нашу гісторыю і вырашыў благаславіць шлюб».
У сужэнскім пасведчанні напісана: «18 студзеня 2018 г., падчас папскага авіярэйсу з Сант’яга ў Ікіке, спадар Карлас Куфанда Элар’яга і спадарыня Паўла Падэста Руіс заключылі сужэнскі саюз у прысутнасці сведкі Іньясіо Куэто. Святы Айцец Францішак прыняў выраз згоды».
