Самалёт са Святым Айцом на борце 15 студзеня прызямліўся ў аэрапорце Сант’яга-дэ-Чылі, дзе распачаўся першы этап 22-га Апостальскага падарожжа папы Францішка, якое стала яго шостым падарожжам у Лацінскую Амерыку.
У аэрапорце Пантыфіка віталі прэзідэнт Чылі Мішэль Бачэлет, а таксама арцыбіскуп Сант’яга і прымас Чылі кардынал Рыкардо Эссаці Андрэльё. Прагучалі гімны Чылі і Ватыкана, пасля чаго маленькая дзяўчынка ў гонар Папы пад акампанемент аркестра выканала традыцыйную песню.
З аэрапорта Святы Айцец на машыне скіраваўся ў касцёл Сан-Луіджы Бэлтран-дэ-Пудаўэль, што знаходзіцца на ўсходзе чылійскай сталіцы. Там Пантыфік памаліўся на месцы пахавання Слугі Божага Энрыке Альвэара Урруціа, памерлага ў 1982 годзе дапаможнага біскупа Сант’яга, якога называлі «біскупам бедных».
Адтуль Святы Айцец у «папамабілі» праехаў у нунцыятуру. Па дарозе яго віталі шматлікія вернікі.
16 студзеня папа Францішак сустракаецца з прадстаўнікамі дзяржаўных уладаў краіны і з простымі чылійцамі, якія вельмі чакалі гэтага візіту.
