Па просьбе халдэйскага біскупа Башара Варды маладая сужэнская пара ўрачоў узначаліць у Эрбілі адміністрацыю каталіцкай бальніцы, першай у краіне пасля падзення самаабвешчанай Ісламскай дзяржавы.
Дваццацівасьмігадовыя Сэвін Агана і Бан Ісакі на сёння заканчваюць у аўстралійскім каталіцкім універсітэце Брысбена магістратуру адміністравання структуры па ахове здароўя. У інтэрв’ю газеце «Caldean View» студэнты адзначылі, што новая бальніца будзе размешчана ў хрысціянскім раёне горада Эрбіля, на поўначы Ірака, і будзе называцца «Shalom», або «Мір».
Па словах Сэвін Аганы, «мансеньёр Варда выказаў жаданне, каб хрысціяне прысутнічалі ў Іраку разам са сваімі каштоўнасцямі, асабліва ў сферы адукацыі і аховы здароўя». Для маладой пары гэта стала сапраўдным выклікам: яны павінны былі пакінуць усё, адмовіцца ад кар’еры, каб сказаць «так» новаму пакліканню.
У мінулым яны ўжо служылі валанцёрамі ў дыяцэзіі Эрбіля і дапамагалі бежанцам з Ніневійскай раўніны. Сёння Сэвін Агана і Бан Ісакі хочуць прысвяціць гэтаму ўсе свае прафесійныя навыкі і сілы; па іх словах, «кожны жыхар Ірака больш за ўсё хоча міру».
