Каталіцкі Патрыярхат халдэйскага абраду атрымаў новую назву: цяпер ён будзе называцца Багдадскім Патрыярхатам.
Як паведамляе Беларуская рэдакцыя парталу Vatican News, падчас сінадальнай сесіі, якая прайшла ў Багдадзе 9–14 жніўня мінулага года, іерархі мясцовай усходне-каталіцкай Царквы прынялі рашэнне аб змене назвы супольнасці, раней вядомай як Вавілонскі Халдэйскі Патрыярхат. Новую назву ўхваліў Папа Францішак, прыняўшы просьбу Патрыярха кардынала Луіса Рафаэля Сако. Аб гэтым рашэнні ў Ватыкане абвясцілі 19 лютага.
Халдэйская Каталіцкая Царква, якая існуе з 1553 года, з’яўляецца адной з самых аўтарытэтных супольнасцяў на Блізкім Усходзе.
Гэта каталіцкая галіна Асірыйскай Царквы Усходу знаходзіцца ў поўнай еднасці з Рымам і налічвае каля 500 тыс. вернікаў, каля паловы якіх жыве ў Іраку.
