Савет Цэркваў Эстоніі, які аб’ядноўвае дзеючыя ў краіне Цэрквы, прыняў рашэнне аб неабходнасці ўнесці вызначэнне шлюбу ў канстытуцыю як саюзу жанчыны і мужчыны.
Выканаўчы сакратар Савета Руудзі Лейрус адзначыў, што Савет распачне падрыхтоўку да ўнясення паправак у канстытуцыю.
30 лістапада архіепіскап Эстонскай Евангельска-Лютэранскай Царквы Урмас Війлма ў сваім звароце напярэдадні Адвэнту прапанаваў унесці ў канстытуцыю Эстоніі дапаўненне, якое б дакладна вызначыла шлюб як саюз, заключаны паміж мужчынам і жанчынай.
Прапанову Війлма адобрылі саюз Isamaa і Res Publica (IRL), Эстонская кансерватыўная народная партыя (EKRE) і Мэтавы фонд у абарону сям’і і традыцыі (SAPTK). Супраць выступілі Сацыял-дэмакратычная партыя, Цэнтрысцкая партыя, Партыя рэформ і Свабодная партыя.
Урмас Війлма таксама адзначыў, што, калі ў канстытуцыі шлюб будзе вызначаны як саюз аднаго мужчыны і адной жанчыны, гэта дазволіць урэгуляваць спецыяльнымі законамі астатнія спосабы сумеснага пражывання.
