25 тысяч т.зв. «кароткачасовых» валанцёраў дапамогуць у падрыхтоўцы і абслугоўванні 34 Сусветных дзён моладзі (СДМ), якія ў 2019 годзе пройдуць у Панаме.
Пра гэта паведамляюць арганізатары сустрэчы. Сярод валанцёраў будзе і пяць тысяч чалавек з-за мяжы.
«Валанцёры з’яўляюцца рукамі СДМ, гэта яны ахвяруюць свой час, таленты і здольнасці, каб гэтая падзея адбылася, — адзначае каардынатар валантарыяту СДМ Панама-2019 Кабхір Пахека ў размове з панамскім тэлеканалам Telemetro. — Падобна як і ў папярэдніх сустрэчах СДМ, валанцёры будуць дапамагаць пілігрымам і біскупам падчас сустрэчы; у месцах, у якіх будзе арганізаваны начлег і харчаванне, а таксама падчас прыбыцця ўдзельнікаў СДМ у Панаму».
Акрамя таго, на СДМ будуць задзейнічаны і т.зв. «доўгатэрміновыя» валанцёры. Частка з іх — каля 300 чалавек — распачнуць працу ў былым будынку нунцыятуры ў Панаме, перададзенай у карыстанне арганізатарам СДМ у Панаме. Іншыя валанцёры далучацца да іх у бліжэйшыя месяцы.
34-я Сусветныя дні моладзі ў Панаме пройдуць 22-27 студзеня 2019 года пад дэвізам «Вось я, слуга Пана. Няхай мне станецца паводле твайго слова» (пар Лк 1, 38). Традыцыйныя дні ў дыяцэзіях, запланаваныя на 17-21 студзеня, будуць арганізаваны на тэрыторыі Панамы, Коста-Рыкі і Нікарагуа.
