Урад Злучаных Штатаў у канцы мінулага тыдня прыняў чарговыя рашэнні, згодна з якімі абавязковае страхаванне здароўя працуючых можа не ўключаць аборты і кантрацэпцыю, калі гэта супярэчыць маральным прынцыпам працадаўцаў.
«Прымушэнне працадаўцаў да фінансавання [абортаў і кантрацэпцыі], што можа супярэчыць іх рэлігійным прынцыпам, не адпавядае дзяржаўным інтарэсам», — гаворыцца ў новых правілах, якія былі апублікаваныя адміністрацыяй.
У маі рэспубліканец Дональд Трамп падпісаў указ, згодна з якім рэлігійныя арганізацыі вызваляліся ад фінансавання абортаў і кантрацэпцыі для сваіх супрацоўнікаў. Цяпер гэтае правіла было пашырана на ўсе арганізацыі, як камерцыйныя, так і некамерцыйныя.
Згодна з прынятым пры прэзідэнце ад Дэмакратычнай партыі Бараку Абаме ў 2010 годзе законам пра абавязковае страхаванне працуючых, ад фінансавання абортаў вызваляліся пераважна толькі дыяцэзіі і парафіі, а вось рэлігійныя дабрачынныя ці медыцынскія арганізацыі не былі ў іх шэрагу.
Гэтак, у ЗША дзейнічаюць сотні каталіцкіх шпіталёў і ясляў. Рашэнне адміністрацыі прэзідэнта Трампа выклікала пазітыўную рэакцыю ў каталіцкай і права-кансерватыўнай прэсе ЗША, аднак левая прэса назвала гэта «нападам на рэпрадуктыўныя правы жанчын».
