Мех, фрагменты якога захоўваюцца на працягу сямі стагоддзяў у кляштары францішканаў у мястэчку Фалоні ды Мантэла каля Авеліна ў Італіі, сапраўды належаў Францішку з Асізі. Гэта ўстанавілі дацкія і італьянскія вучоныя, якія працуюць пад кіраўніцтвам Каарэ Лунд Расмусэна з універсітэта Паўднёвай Даніі ў Одэнсе.
Паводле легенды, зімой 1224 г. святы Францішак Асізскі папрасіў анёла перадаць з Францыі, дзе ён тады знаходзіўся, мех з хлебам у італьянскі кляштар.
Як адзначае Каарэ Расмусэн, навуковыя даследаванні не могуць даказаць аўтэнтычнасць легенды, але дазваляюць праверыць, ці сапраўды аб’ект звязаны з пэўнымі падзеямі і ці не з’яўляецца фальшыўкай.
Даследчыкі, як паведамляецца на cambridge.org, устанавілі, што ў торбе, знойдзенай у 1224 годзе ля парога кляштара ў Фалоні, сапраўды захоўваўся хлеб. Хімікі знайшлі ў валокнах меха рэшткі эргастэрола — рэчыва, якое выпрацоўваецца спарынняй, грыбком-паразітам пшаніцы, чые споры нярэдка траплялі ў муку разам са змолатым зернем.
Як паказаў радыёвугляродны аналіз, узрост меха складае прыкладна 740 гадоў. Гэта азначае, што рэч сапраўды паходзіць з эпохі, у якую жыў святы Францішак і калі адбылася тая падзея, пра якую кажуць манахі і легенда.
