Каталіцка-тэалагічны факультэт Універсітэта Людвіга-Максіміліяна ў Мюнхене (Германія) афіцыйна прысвоіў ступень доктара кананічнага права ксяндзу Віктару Гайдукевічу SDB, які паходзіць з Беларусі і з’яўляецца членам Таварыства Святога Францішка Сальскага.
Рашэнне было прынята пасля паспяховага завяршэння поўнага курса доктарскай падрыхтоўкі і абароны дысертацыі ў галіне кананічнага права.
Урачыстае завяршэнне працэдуры адбылося 23 чэрвеня пад старшынствам прэзідэнта ўніверсітэта прафесара доктара Бэрнда Хубэра і дэкана факультэта прафесара кананічнага права доктара Эльмара Гютгофа, аднаго з вядучых спецыялістаў у гэтай галіне.
Навуковае даследаванне было выканана ў межах VI кнігі кананічнага права «Карныя санкцыі ў Касцёле» з улікам актуальных аспектаў працэсуальнага права. У працы праведзены паглыблены аналіз развіцця кананічных нормаў у розных гістарычных рэдакцыях Кодэкса кананічнага права (1917, 1983, а таксама рэформа 2021 года) з улікам практыкі іх прымянення ў сучасным дысцыплінарным кантэксце.
Даследаванне спалучае тэарэтычную глыбіню з практычнай накіраванасцю і ўносіць важкі ўклад у развіццё сучаснай кананічнай юрыспрудэнцыі.
