У рэкалекцыйным доме пры парафіі святога Арханёла Міхала ў Навагрудку (Гродзенская дыяцэзія) з 11 па 13 кастрычніка праходзілі рэкалекцыі «Выходныя з Францішкам».
Духоўныя практыкаванні арганізавалі і правялі меншыя браты капуцыны з парафіі святога Казіміра ў Маладзечне і з парафіі святога Валянціна ў Смалявічах пры дапамозе валанцёраў з моладзевай супольнасці Таў.
У рэкалекцыях бралі ўдзел больш за 40 чалавек з розных мясцін Беларусі: з Астраўца, Баранавічаў, Гродна, Маладзечна, Мінска і Смалявічаў.
Сярод іх былі прадстаўнікі Францішканскага ордэна свецкіх і людзі, якія толькі пачынаюць сваё знаёмства з францішканскай духоўнасцю.
Падобныя рэкалекцыі для дарослых адбываліся ўпершыню, і дакладная іх праграма не была вядома ўдзельнікам, што, дарэчы, з’яўляецца адметнай рысай капуцынаў: нечаканасць.
Рэкалекцыі пачаліся з вечара знаёмстваў, з супольнай малітвы і адарацыі ў капліцы рэкалекцыйнага дома, што працягвалася да позняй ночы. У наступныя два дні да праграмы дадаліся канферэнцыі братоў Сяргея Гусара OFMCap, Вадзіма Войціка OFMCap і сястры Марыі Емельянчык OP з Баранавічаў, якія дазволілі дакрануцца да жыццёвага шляху, выпрабаванняў, духоўных пошукаў святога Францішка Асізскага, глыбей зразумець яго ролю ў хрысціянстве, а таксама ўбачыць актуальнасць і каштоўнасць яго духоўнай спадчыны для асабістага духоўнага жыцця чалавека.
Акрамя таго, у межах рэкалекцый адбывалася праца ў групах, якой папярэднічала так званая «пустыня» — час, калі кожны ў цішыні і адзіноце мог сустрэцца з Богам і з самім сабою, разважаючы над прапанаванымі пытаннямі.
Капліца сабрала ўсіх удзельнікаў на святую Імшы ў суботу ўвечары, а ў нядзелю — касцёл святога Арханёла Міхала. Абедзьве цэлебрацыі ўзначаліў брат Уладзіслаў Мінько OFMCap. Кожны меў магчымасць прыступіць да сакрамэнту паяднання.
Дзякуючы сумесным намаганням і рэпетыцыям, пад кіраўніцтвам брата Вадзіма атрымалася развучыць некаторыя малітоўныя кампазіцыі і забяспечыць музычнае суправаджэнне ўрачыстай Імшы.
Акрамя духоўнай часткі, праграма рэкалекцый уключала і вольны час, забаўляльныя мерапрыемствы: інтэлектуальную гульню на эрудыцыю на рэлігійную тэматыку і не толькі, знаёмства з касцёлам святога Арханёла Міхала, які сёлета святкуе 400-гадовы юбілей, а таксама экскурсію па Навагрудку, што дазволіла дакрануцца да гісторыі аднаго з самых старажытных гарадоў Беларусі.
Па словах удзельнікаў, рэкалекцыйны час быў вельмі насычаным, каштоўным і стаў добрай нагодай для паглыблення веры, знаёмстваў людзей розных узростаў, для адкрыцця на іншага чалавека і проста прысутнасці ў жыцці адзін аднаго.
