Каталіцкая манахіня з Індыі ўганаравана прэстыжнай міжнароднай узнагародай за напісанне навучальнага курса па дагляду пацыентаў, хворых на ВІЧ/СНІД. Гэта першая ў свеце магістэрская праца на тэму дагляду такіх хворых, якая атрымала сваё ажыццяўленне на практыцы.
Сястра Лурду Мэры Наготу нясе сваё служэнне ў вясковай мясцовасці Панчгані, штат Махараштра, у якой налічваецца каля 13 тысяч жыхароў. Кіруе сястрынскім аддзяленнем у бальніцы, а таксама з’яўляецца дырэктарам коледжу медсясцёр.
Міжнародную прэмію за дагляд за хворымі на ВІЧ/СНІД індыйская манахіня атрымае ад Асацыяцыі медсясцёр па апецы над хворымі на СНІД. Як інфармуе англійская рэдакцыя Ватыканскага радыё, узнагароджанне адбудзецца падчас канферэнцыі, якая пройдзе ў Даласе, штат Тэхас у ЗША, 2-4 лістапада.
