Больш за дзве тысячы хлопцаў і дзяўчат з азіяцкага рэгіёну бяруць удзел у 7 Азіяцкіх днях моладзі — сустрэчы, якая ўзяла натхненне ў Сусветных днях моладзі.
Злёт моладзі, арганізаваны Федэрацыяй Азіяцкіх Канферэнцый Біскупаў, сёлета праходзіць у Інданезіі пад дэвізам «Радасная азіяцкая моладзь! Жыццё Евангелля ў шматкультурнай Азіі». У сустрэчы прымаюць удзел таксама маладыя мусульмане.
Азіяцкія дні моладзі сваёй формулай нагадваюць СДМ. Яны складаюцца з дзён у дыяцэзіях, якія прымаюць гасцей, а таксама цэнтральных падзей, за якія адказвае адна з дыяцэзій. Напярэдадні сустрэчы адбываецца пілігрымка крыжа Азіяцкіх дзён моладзі.
Дні ў дыяцэзіях — гэта час, калі пілігрымы жывуць разам з інданезійскімі сем’ямі на тэрыторыі 11 дыяцэзій гэтай краіны. Як адзначаюць арганізатары, гэта час больш блізкага знаёмства з лакальным Касцёлам і грамадствам, а таксама сумесная праца, якая будзе служыць душпастырству моладзі і міжнароднай працы.
У сустрэчы прымаюць удзел 2140 хлопцаў і дзяўчат, якія прадстаўляюць 16 епіскапатаў азіяцкіх краін.
Галоўныя ўрачыстасці 7 Азіяцкіх Дзён Моладзі пройдуць 2-6 жніўня ў Джак’якарце на востраве Ява. Акрамя супольнай малітвы ўдзельнікі сустрэчы будуць разважаць над такімі тэмамі як ахова навакольнага асяроддзя, барацьба з карупцыяй і інш. Сярод валанцёраў сустрэчы знаходзяцца таксама прадстаўнікі мусульманскай моладзі, якая дзеліцца з равеснікамі сведчаннем сваёй веры.
Спецыяльнае пасланне да ўдзельнікаў сустрэчы скіруе таксама папа Францішак.
Азіяцкія дні моладзі праходзяць кожныя тры гады ў адной з азіяцкіх краін. Папярэднія сустрэчы праходзілі ў Тайландзе, Тайвані, Індыі, Ган Конгу, на Філіпінах, у Паўднёвай Карэі, дзе падчас свайго апостальскага візіту з удзельнікамі сустрэчы сустрэўся папа Францішак.
