З 10 па 17 лістапада ў Вільні праходзілі адпустовыя ўрачыстасці Апекаў Найсвяцейшай Панны Марыі, Маці Міласэрнасці — Маці Божай Вастрабрамскай.
З гэтай нагоды штодзённа ў Вастрабрамскай капліцы і ў касцёле святой Тэрэзы пры Вострай Браме адбываліся малітвы і адпустовыя цэлебрацыі на розных мовах.
У суботу 16 лістапада, у сам дзень урачыстасці Маці Божай Вастрабрамскай, у касцёле цэлебравалася святая Імша на беларускай мове.
У ёй узялі ўдзел як мясцовыя вернікі беларускага паходжання, якіх нямала жыве на Віленшчыне, так і пілігрымы з Беларусі і іншых краін. Дзякуючы прамой трансляцыі, што вялася на сайце санктуарыя, да супольнай малітвы далучыліся тысячы суайчыннікаў з усяго свету.
Усіх сабраных у святыні шчыра прывітаў душпастыр віленскіх беларусаў каталіцкага веравызнання брат Сяргей Мацюшонак OFMCap, пробашч парафіі святога Барталамея на Зарэччы ў Вільні, дзе рэгулярна цэлебруюцца Імшы на роднай мове. Хор гэтай парафіяльнай супольнасці аздобіў урачыстасць сваім спевам.
У прамоўленай падчас Эўхарыстыі гаміліі святар перадусім адзначыў, што «гісторыя цудадзейнага абраза ў Вастрабрамскай капліцы з’яўляецца адлюстраваннем гісторыі гэтага горада і гэтага народа, які перажываў нялёгкія часы крызісаў і заняпадаў, свайго росквіту і хвалы».
«Мы сёння, як і нашыя продкі і папярэднікі ў веры, пакорна становімся на калені перад тваім святым абліччам, Матуля, і аддаем Табе нашыя народы і нашыя сем’і. Вядзі нас, Святая Панна, і прытуляй да свайго матчынага сэрца свайго. Паказвай нам дарогу да Сына Твайго і да саміх сябе», — скіраваў малітоўны заклік да Багародзіцы брат Сяргей.
Разважаючы над прачытаным урыўкам з Евангелля пра адведзіны Марыяй святой Альжбеты, капуцын заўважыў, што Марыя з’яўляецца ўзорам любові і служэння, а Яе адведзіны становяцца крыніцай радасці для Альжбеты і Яна.
«Гэтая сустрэча паказвае не толькі любоў і падтрымку паміж жанчынамі, але і нагадвае пра Божую міласэрнасць, якая праяўляецца ў штодзённых міжасобасных адносінах.
Марыя як Маці Міласэрнасці становіцца ўзорам для ўсіх, хто жадае несці дапамогу і радасць іншым, асабліва ў цяжкія хвіліны жыцця. Як жа гэта актуальна для нас сёння!» — падкрэсліў брат Сяргей Мацюшонак, дадаўшы, што прысутнасць Марыі у цудатворнай Вастрабрамскай іконе з’яўляецца сімвалам надзеі і міласэрнасці, якія Марыя нясе сучаснаму свету і кожнаму з нас.
Разважаючы над тым, чаму сучасныя вернікі могуць вучыцца сёння у Марыі, святар перадусім звярнуў увагу на веру і паслухмянасць, а таксама на прыняцце Божай ласкі, трываласць у веры, а таксама на такія цноты, як дабрыня, міласэрнасць, пакора і цярплівасць. Паводле душпастыра віленскіх беларусаў, ва ўсім гэтым Марыя праяўляе сваё заступніцтва і мацярынства, а таксама дае найлепшы прыклад хрысціянскага жыцця
Гамілію брат Сяргей Мацюшонак завяршыў словамі малітвы святога Максімільяна Марыі Кольбэ:
«Маці Божая Вастрабрамская, Ты не маеш у сваіх руках Дзіцяткі Езуса, то вазьмі мяне ў свае рукі і пранясі шчасліва праз усё жыццё».
На заканчэнне Імшы ўсе прысутныя памаліліся літанію да Найсвяцейшай Панны Марыі перад спісам цудадзейнага абраза Маці Божай Вастрабрамскай.
