21 мая беларускае душпастырства ў Беластоку (Польшча) наведаў дапаможны біскуп Беластоцкай архідыяцэзіі Генрых Цярэшка.
У гэтую нядзелю ў Касцёле ў Польшчы адзначалася ўрачыстасць Унебаўшэсця Пана, якая ў Беларусі адзначаецца ў чацвер пасля Шостай Велікоднай нядзелі.
Сустрэча беларусаў-католікаў Беластока з адным з мясцовых іерархаў адбылася ў межах біскупскай візітацыі парафіі Маці Божай Гвадэлупскай, дзе з лістапада мінулага года рэгулярна збіраюцца на малітву вернікі беларускага паходжання.
На пачатку Імшы біскуп Цярэшка прывітаў прысутных на беларускай мове, зазначыўшы, што вельмі добра яе разумее.
У гаміліі іерарх звярнуўся да вернікаў па-польску. Ён падзяліўся сваімі ўспамінамі ад наведвання Беларусі, расказаў, што некалі выкладаў у Гродзенскай семінарыі і хадзіў у пешую пілігрымку Беласток–Вільня, маршрут якой часткова праходзіць праз Гродзенскую дыяцэзію.
Напрыканцы пастыр адзначыў: «І тут, і там мы разам».
На жаль, біскуп Цярэшка не змог прысутнічаць да канца святой Імшы і сышоў раней, але беларусы знайшлі хвілінку, каб выказаць падзяку за магчымасць маліцца на роднай мове, жывучы за мяжой.
Святыя Імшы па-беларуску ў парафіі Маці Божай Гвадэлупскай у Беластоку кожную нядзелю а 14-й гадзіне цэлебруе ксёндз Гжэгаж Балеста.
