Антоніа Арэльяна, які нарадзіўся ў сціплай перуанскай сям'і, стаў адным з самых папулярных шаўцоў у Рыме і Ватыкане. Яго новы кліент — Папа Леў XIV.
Каб натрапіць на гэтую маленькую крамку, трэба заблудзіцца ў вузкіх вулачках, якія перасякаюць Борга, раён непадалёк ад Ватыкана. На першы погляд, гэта звычайная шавецкая майстэрня, як і дзясяткі іншых у Рыме. Вы заходзіце і вашыя ноздры напаўняе водар дублёнай скуры. Адна дэталь адразу кідаецца ў вочы: над прылаўкам вісяць незлічоныя фатаграфіі ўладальніка Антоніа Арэльяна з трыма апошнімі Папамі.
У сваёй краме, дзе захоўваюцца дзясяткі рознакаляровых туфляў, рамянёў і кашалькоў, гэты чалавек цёпла сустракае пакупнікоў з усмешкай на твары. 58-гадовы мужчына, які неафіцыйна носіць тытул «папскага шаўца», пачынаў з нуля (ці амаль з нуля).
З Перу ў Рым
«Я прыехаў у Італію ў 1990 годзе і адкрыў гэтую краму ў 1998 годзе», — тлумачыць ураджэнец Трухільё, што ў Перу. Яго родны рэгіён славіцца майстрамі абутковай справы. Ён пачаў працаваць у вельмі раннім узросце і праявіў незвычайны талент. У 14 гадоў ён ужо зарабляў, паводле яго ўласных слоў, «зарплату майстра».
Пад уплывам эканамічнага крызісу, які ахапіў яго краіну, ён вырашыў паспрабаваць шчасце на іншым канцы свету, у Італіі, дзе пражывае вялікая перуанская дыяспара. Яго ўсмешка змяняецца эмоцыямі, калі ён успамінае свае раннія гады ў Рыме.
«Я пачынаў тут, рамантуючы абутак у гэтай майстэрні»,
— тлумачыць ён, паказваючы на сваё працоўнае месца.
За яго плячыма мы бачым інструменты, абрэзкі скуры і пары абутку ў працэсе рамонту, раскіданыя ля сцяны, на якой вісяць абразы з выявамі Панны Марыі і айца Піо.
Яго абутак, пашыты ўручную па індывідуальных мерках, хутка заваяваў добрую рэпутацыю на левым беразе Тыбра. Блізкасць да сэрца Касцёла адчыніла дзверы для вельмі спецыфічнай кліентуры…
«Спачатку прыходзілі сёстры законныя, потым святары і гэтак далей. Яны казалі мне: "Мяне паслала сястра вось такая, айцец вось такі парэкамендаваў мне прыйсці"».
Сарафаннае радыё было яго лепшым саюзнікам: вельмі хутка нават біскупы і кардыналы сталі прыходзіць у яго маленькую краму, каб замовіць сабе пару туфляў «Арэльяна».
Кліент, не падобны ні на каго іншага
Адзін з гэтых князёў Касцёла зрабіў асаблівае ўражанне на перуанскага шаўца: кардынал Ратцынгер. «Ён быў вельмі спакойны, вельмі стрыманы чалавек. Ён заходзіў і садзіўся там», — кажа ён, паказваючы на крэсла, схаванае ў куце невялікай майстэрні.
У яго завязалася сапраўднае сяброўства з нямецкім прэлатам, якое працягвалася да знамянальнага дня 19 красавіка 2005 года: «Мой кліент стаў Папам!»
Гэта стала выдатнай рэкламай і сапраўднай радасцю для перуанца, які неўзабаве сустрэўся з Бэнэдыктам XVI і падарыў яму знакамітыя чырвоныя туфлі, якія так часта насіў нямецкі Папа. Нават сёння яны застаюцца адным з самых папулярных рэчаў у яго калекцыі.
Падчас Пантыфікату Бэнэдыкта XVI Арэльяна некалькі разоў забяспечваў яго абуткам — як чырвоным, так і чорным. Пасля яго адстаўкі яны працягвалі падтрымліваць цесныя адносіны, і Папа не забыўся адзначыць яго 50-годдзе.
Яго твар становіцца больш сур'ёзным, калі ён кажа пра смерць нямецкага Пантыфіка. Глыбока крануты, ён паказвае фатаграфію цела Папы, выстаўленага для развітання пасля яго смерці, і паказвае на адну дэталь: Бэнэдыкт XVI быў абуты ў туфлі Арэльяна, якія ён забраў з сабой у вечнасць. Гэты апошні жэст сяброўства асабліва крануў перуанскага майстра.
Гісторыя працягваецца з Францыскам і Папам Львом XIV
Антоніа Арэльяна прызнае, што быў менш блізкі да Папы Францішка. Аргентынскі Пантыфік насіў артапедычны абутак. «Ён быў верны шаўцу, які вырабляў яму абутак на працягу 40 гадоў, і я вельмі паважаю гэта», — тлумачыць ён без горычы. Папа Францішак таксама зрабіў яму падарунак, блаславіўшы іх з жонкай заручальныя пярсцёнкі ў гонар 25-й гадавіны вяселля.
Над яго галавой размешчаны больш свежыя фатаграфіі, якія сведчаць аб тым, што гісторыя адносін з Папамі працягваецца: неўзабаве пасля абрання ён і яго сын, з якім ён зараз працуе, былі прыняты Папам Львом XIV, якога перуанцы лічаць сваім суайчыннікам.
«Ён цудоўны чалавек. Мы размаўлялі па-іспанску і абмяркоўвалі Перу»,
— кажа Антоніа.
Але што яшчэ больш важна, новы Папа замовіў у іх абутак. Працягнуўшы руку пад прылавак, мужчына выцягнуў жоўтую кардонную папку. Пераканаўшыся, што мы не зробім фатаграфію, ён акуратна дастаў ліст паперы фармату А4. У яго мазолістых руках былі замеры ступняў наступніка Пятра. Ручкай шавец надрапаў некалькі лічбаў і абвёў контур ступні Папы.
«Я прапаноўваў яму розныя колеры, але ён настойваў на чорным», — сказаў шавец. Праз дваццаць дзён пасля гэтай сустрэчы былі дастаўлены дзве пары абутку, вырабленага на замову. Місія шаўца была выканана, бо ён вельмі хацеў, каб наступнік Пятра адчуваў сябе камфортна ў сваім абутку.
