![](/3/images/news/2022/12/2018-12-22-agon-002.jpg)
У суботу 10 снежня ў Вене (Аўстрыя) адбудзецца традыцыйнае экуменічнае набажэнства, падчас якога скаўтам з розных краін свету будзе перададзена Бэтлеемскае святло міру.
Як паведаміла Каталіцкае інфармацыйнае агенцтва КАІ, набажэнства ў касцёле Святой Сям’і ў Вене правядуць старшыня Экуменічнай рады Цэркваў у Аўстрыі і дэкан венскай катэдры святога Стэфана ксёндз Рудольф Прокшы, англіканскі канонік Патрык Куран, а таксама праваслаўны святар Нікалаўс Рапэрт. Набажэнства пройдзе пад дэвізам: «Пасадзіць дрэва надзеі на мір».
Падчас цырымоніі сёлетняе «дзіця Святла міру» Сара Носка перадасць Бэтлеемскае святло скаўтам з некалькіх краін, між іншым з Германіі, Польшчы, Славакіі, Чэхіі і Швейцарыі.
Дзяўчынка запаліла яго ў Гроце Нараджэння Хрыста ў Бэтлееме 15 лістапада.
З 1986 года агонь ад алейнай лампады, што гарыць у бэтлеемскай пячоры над срэбранай зоркай, якой адзначана месца нараджэння Хрыста, запальвае дзіця з Верхняй Аўстрыі, выбранае для гэтай місіі не толькі за добрую вучобу, але і за грамадскую актыўнасць. Падчас экуменічнага набажэнства ў Аўстрыі дзіця перадае запаленае ў Бэтлееме святло ў розныя краіны як сімвал надзеі на мір у свеце.
![](/3/images/news/2022/12/2022-12-08-Betlehem.jpg)
Паводле звестак каталіцкага інфармацыйнага агенцтва Kathpress, сёлетняе «дзіця Святла міру», 12-гадова Сара Носка, з’яўляецца вучаніцай школы ў Альтэнбергу. Яна была выбраная на гэтую ролю, паколькі клапацілася пра сваіх украінскіх сябровак у школе. Адзначаецца, што дзяўчынка вельмі таварыская і заўсёды гатовая дапамагчы іншым.
На думку Сары, гэты святочны звычай — «просты знак, але ён прыносіць радасць многім людзям і штогод нагадвае нам, наколькі важны мір для ўсіх нас».
Сара Носка ўручыць Бэтлеемскае святло міру Папу Францішку падчас агульнай аўдыенцыі на плошчы Святога Пятра 14 снежня.
Ужо 4 снежня Бэтлеемскае святло на борце самалёта аўстрыйскіх авіяліній было дастаўлена ў Нью-Ёрк, дзе яго ўрачыста сустрэлі ў міжнародным аэрапорце імя Джона Кэнэдзі.
![](/3/images/news/2022/12/2022-12-08-adda-brandstetter-1024x760.jpg)
Упершыню Бэтлеемскае святло міру было запалена ў 1986 годзе па ініцыятыве радыё ORF з Верхняй Аўстрыі. Ініцыятаркай акцыі стала аўстрыйская мастачка Ада Брандштэтэр, якая ў тым жа годзе выступіла з прапановай, каб у Вігілію Божага Нараджэння згаданая радыёстанцыя падзякавала спецыяльным агеньчыкам усім спонсарам, якія сталі ўдзельнікамі ўжо шмат гадоў папулярнай у Аўстрыі акцыі дапамогі невідушчым «Святло ў цемры».
З гэтага ўзнікла новая задума — Святло міру з Бэтлеема, якое сёння ўжо стала неадменным калядным звычаем у больш як 30-і краінах, у тым ліку і ў Беларусі.
Ужо шмат гадоў беларускія каталіцкія скаўты прымаюць святло ад сваіх замежных сабратоў і развозяць яго па касцёлах ва ўсіх дыяцэзіях нашай краіны.
Кожны вернік можа запаліць ад яго ліхтарык або зніч і занесці Бэтлеемскае святло дадому як сімвал Хрыста, пры Нараджэнні якога анёлы абвясцілі супакой на зямлі ўсім людзям добрай волі.