Дзень 1 чэрвеня стаў вызначальнай датай у шматпакутнай гісторыі рыма-каталіцкай парафіі святога Мікалая ў Кіеве: у гэты дзень дзякуючы намаганням шматлікіх вернікаў была адноўлена гістарычная справядлівасць, і хрысціянская святыня вярнулася ва ўлонне Касцёла.
Як паведамляецца на старонцы парафіі ў сацыяльнай сетцы facebook, з гэтай нагоды ў касцёле адбылося ўрачыстае набажэнства.
У ім узялі ўдзел ардынарый Кіеўска-Жытомірскай дыяцэзіі біскуп Віталій Крывіцкі SDB, дапаможны біскуп Аляксандр Язлавецкі, сакратар Апостальскай нунцыятуры ва Украіне Джозэф Марамрэдзі, прадстаўнікі іншых канфесій, святары і вернікі украінскай сталіцы.
Як паведамляе Каталіцкі медыя-цэнтр Канферэнцыі рыма-каталіцкіх біскупаў ва Украіне, урачыстасць распачалася малітваю Ружанца перад святыняй, якую правёў настаяцель Дэлегатуры місіянераў аблатаў ва Украіне ксёндз Віталій Падалян ОМІ. Разам з ім маліліся маленькія вернікі парафіяльнай супольнасці. Цяпер дзяцей у парафіі вельмі мала, паколькі з-за вайны шматлікія сем’і былі вымушаны пакінуць Кіеў і яшчэ не вярнуліся.
Пасля Ружанца адбылася цырымонія благаслаўлення ключа і ўваходных дзвярэй у касцёл, якую правёў біскуп Крывіцкі.
Пробашч парафіі ксёндз Паўло Вышкоўскі ОМІ нагадаў пра балючыя старонкі з гісторыі супольнасці, перадусім пра трагічныя падзеі 1938 года, калі злачынны савецкі рэжым зачыніў святыню. Біскупу перадалі ключ ад касцёла, які, здзейсніўшы абрад благаслаўлення, увёў вернікаў у святыню, каб там працягнуць супольную малітву Эўхарыстыяй.
Касцёл напоўніўся вернікамі і духоўнымі асобамі з усяго Кіева.
Скрынкі з гуманітарнай дапамогай, раскладзеныя па закутках, нагадвалі пра тое, што краіна перажывае вайну.
Ад пачатку расійскай агрэсіі ва Украіне, парафія стала не толькі асяродкам узмоцненай малітвы, але і месцам, дзе патрабуючыя могуць атрымаць неабходнае для існавання. Дзякуючы вернікам парафіі і валанцёрам, якія збіраюцца пры касцёле, за гэты час было размеркавана каля 300 тон гуманітарнай дапамогі.
У прамоўленай гаміліі біскуп Крывіцкі асцярог вернікаў ад таго, што можа закрыць дзверы перад Богам: абыякавасці, эгаізму, бязвер’я. Іерарх падкрэсліў, што, хоць пакуль што планы афіцыйнай перадачы касцёла вернікам былі перакрэслены з-за таго, што прадстаўнікі ўлады не змаглі своечасова аформіць неабходныя дакументы, аднак амаль 100 дзён вайны паказалі, што парафіяльная супольнасць паўнавартасна функцыянуе, адчувае сябе ў сваёй святыні як дома, служыць патрабуючым.
«Наперадзе яшчэ шлях афармлення дакументаў, але ўжо сёння я абавязваю пробашча і парафіяльную супольнасць, каб гэтае месца было не „каменем спатыкнення“, а „шпіталем“ для ўсіх, хто ў патрэбе», — сказаў біскуп Віталій Крывіцкі. Плануецца, што цяпер дзверы касцёла будуць адчынены для ўсіх, незалежна ад раскладу набажэнстваў, каб святыня была духоўным аазісам.
З нагоды Міжнароднага дня абароны дзяцей малітву вернікаў на Імшы чыталі дзеці. Яны маліліся не толькі за Каталіцкі Касцёл, за Украіну і за за мір, але таксама за ўсіх дзетак, якія пацярпелі ад вайны, і за дабрадзеяў, якія дапамагалі ў справе вяртання святыні.
У працэсіі з дарамі маленькія вернікі прынеслі цацкі як сімвал дзяцінства і малітвы за тых дзетак, чыё дзяцінства абарвалася занадта рана.
Яны таксама прынеслі малюнак — увасабленне мараў пра свабоду і мірнае неба над Украінай, зборнік вершаў Ліны Кастэнка, вышыванку і ручнік як сімвалы украінскай культурнай спадчыны.
На заканчэнне Імшы да прысутных звярнуліся прадстаўнікі дзяржаўных уладаў. Міністр культуры і інфармацыйнай палітыкі Украіны Аляксандр Ткачэнка выказаў спадзяванне, што ўсе юрыдычныя пытанні адносна перадачы касцёла парафіі неўзабаве будуць вырашаны.
Парафіяне, са свайго боку, узялі на сябе абавязак аднаўлення, рэстаўрацыі і захавання святыні, стан якой пакідае жадаць лепшага.
Пробашч парафіі запэўніў, што з 2 чэрвеня «дзверы касцёла будуць адчынены з ранку да вечара для ўсіх людзей добрай волі».
